Daga SANUSI MUHAMMAD a Gusau
Babban Daraktan ƙungiyar Patriot for the Advancement of Peace and Social Development kuma manazarcin siyasa a ƙasar nan Dakta Sani Abdullahi Shinkafi ya bayyana cewa akwai buƙatar gyara wasu sassan kundin tsarin mulkin Nijeriya na 1999 da nufin baiwa ƙananan hukumomi cikakku. cin gashin kansu na kuɗi.
A cewarsa, Kundin tsarin mulki na 1999 yana da tanadi “mai kyau, mara kyau, da mummuna” don haka yana buƙatar gyara.
Dakta Shinkafi a wata hira da manema labarai, ya yi tsokaci kan ziyarar da wata ƙungiya mai suna Patriots ƙarƙashin jagorancin tsohon Sakatare-Janar na Commonwealth Cif Emeka Anyaoku suka kai wa shugaban ƙasa Bola Ahmed Tinubu.
Ƙungiyar ta buƙaci shugaban ƙasa da ya aike da ƙudirin doka ga majalisar dokokin ƙasar domin samar da kundin tsarin mulkin ƙasar domin ceto ƙasar nan daga tashe-tashen hankula.
Dakta Shinkafi ya bayyana cewa sauya kundin tsarin mulkin ƙasar zai yi kyau a yanzu, musamman idan aka yi la’akari da mawuyacin halin da tattalin arzikin kasar ke ciki a lokacin da al’amura suka yi tsanani ga ‘yan Nijeriya da dama.
Ya yi nuni da cewa, akwai wani tanadi a cikin kundin tsarin mulki na 1999 da ya bayar da damar gyara wasu sassan kundin tsarin mulkin, wanda Majalisar Dokoki ta ƙasa ke da ikon yi, ciki har da Majalisun Jihohi.
“Bisa ga tanade-tanaden kundin tsarin mulki na 1999, ya umurci Majalisar Dokoki ta ƙasa ta kafa kwamitin haɗin gwiwa don gyara kundin tsarin mulkin 1999” inji Dakta Shinkafi.
A cewarsa, akwai ɓukatar majalisar dokokin ƙasar ta kira taron jin ra’ayin jama’a, da neman ra’ayoyin dattijai, da kuma tattara bayanan jama’a domin yin gyara da gyara.
“Sa’an nan kuma su aika wasu sassan da ke buƙatar sauye-sauye zuwa majalisun jihohi don amincewa da su.” Yace
“Bisa ga hukuncin da kotun ƙoli ta yanke kan ‘yancin cin gashin kan ƙananan hukumomi, akwai buƙatar a yi wa kundin tsarin mulki kwaskwarima ta yadda hukumar zaɓe mai zaman kanta ta ƙasa (INEC) ta gudanar da zaɓen ƙananan hukumomi.”
Ya ci gaba da cewa, “yana da matuƙar muhimmanci a canza kundin tsarin mulki na 1999 don ba wa INEC damar gudanar da zabe a ƙananan hukumomi 774 na jihohi 36, ciki har da babban birnin tarayya Abuja, idan da gaske muna son cin gashin kan ƙananan hukumomi.”
“Idan da gaske gwamnati tana son ƙananan hukumomi su kasance masu cin gashin kansu, kuma su yi amfani da kason da aka ware bisa gaskiya, to ya kamata INEC ce ke gudanar da zaɓen ƙananan hukumomi.” Dakta. Shinkafi ya bayyana
Ya soki tsarin da ake yi a halin yanzu inda wasu gwamnonin ke amfani da kason ƙananan hukumomi wajen yin zagon ƙasa, karkatar da su, da kuma arzuta kansu, inda ya jaddada cewa muddin su ne ke gudanar da zaɓe ta hanyar hukumar zaɓe mai zaman kanta ta jiha.
“Don kauce wa wannan mummunan yanayi, akwai buƙatar a sauya kundin tsarin mulki a wannan ɓangare ta yadda INEC za ta iya gudanar da zaɓen ƙananan hukumomi ba SIEC ba.
