Daga ABDULLAHI MUHAMMAD a Katsina
Gwamnan Jihar Katsina, Malam Dikko Umaru Raɗɗa, ya buƙaci malaman addinin Musulunci da su nisanci siyasar ɓangaranci, tare da amfani da tasirinsu na addini wajen inganta zaman lafiya, tsaro, gaskiya da shugabanci nagari a faɗin jihar.
Gwamnan ya bayyana hakan ne yayin wani taron ƙara wa juna sani da gidauniyar Al-Asad Education Foundation ta shirya, mai taken “Rawar da malaman addinin Musulunci ke takawa wajen inganta zaman lafiya da tsaro a Jihar Katsina,” wanda aka gudanar a harabar hukumar kula da ma’aikatan ƙananan hukumomi da ke Katsina.
Gwamna Raɗɗa ya bayyana cewa malaman addinin Musulunci suna da matuƙar daraja da kima a idon al’umma, saboda ana sa ran koyarwarsu za ta kasance bisa koyarwar addini, hujjoji da kuma kyawawan ɗabi’u.
Ya buƙace su da su kare wannan amana ta hanyar kasancewa masu adalci da rashin nuna ɓangaranci a harkokin siyasa, tare da mayar da hankali kan nauyin da ya rataya a wuyansu na jagoranci na addini da tarbiyya.
Gwamnan ya ce, “Dole ne malaman addinin Musulunci su kare mutuncinsu da darajar da suke da ita a cikin al’umma. Nauyin da ke kansu shi ne jagorantar jama’a ta hanyar gaskiya, ingantattun koyarwar addini da hujjoji, maimakon su bari muradun siyasa su rinjayi hukuncinsu.”
Ya lura cewa a wasu lokuta, rashin cika alƙawura na shafar amincewar al’umma ga ’yan siyasa, inda ya bayyana cewa gwamnatinsa ta yi ƙoƙari na musamman wajen cika alƙawuran da ta ɗaukar wa al’ummar Jihar Katsina tun bayan hawanta mulki.
Ya ce, “Shugabanci yana nufin cika alƙawura da tabbatar da gaskiya ta hanyar ayyuka. Idan muka ɗaukar wa jama’a alƙawari, dole ne mu yi aiki tuƙuru wajen tabbatar da cika su, domin mu cancanci amincewar da suka ba mu.”
Haka kuma, Gwamnan ya yaba da gabatar da takarda kan illolin jita-jita, kazafi da zarge-zargen karya, inda ya bayyana cewa wannan batu yana da matukar muhimmanci wajen kare zaman lafiya, amincewar jama’a da kyakkyawar zamantakewa a tsakanin al’umma.
Ya ƙara da cewa ya koyi yadda zai ci gaba da mai da hankali kan nauyin da ke kansa duk da jita-jita da bayanan ƙarya da ake yaɗawa a kansa. Ya buƙaci masu riƙe da muƙaman gwamnati da sauran al’umma da kada su bari bayanan da ba su da tushe su dauke hankalinsu daga gudanar da ayyukansu.
Gwamna Radda ya yi kira ga malaman addinin Musulunci da su yi amfani da wa’azozinsu da sauran tarukan jama’a wajen daƙile ƙiyayya, ƙarfafa zaman lafiya da juna, tare da karfafa warware rikice-rikice ta hanyar lumana.
Tun da farko, kwamishinan tsaron cikin gida da harkokin gida na jihar, Hon. Dr. Nasiru Mu’azu Danmusa, ya yi bayanin yadda matsalar rashin tsaro ta samo asali da kuma sauye-sauyen da ta samu a Jihar Katsina. Ya kuma bayyana matakan da gwamnatin Raɗɗa ta ɗauka domin magance ƙalubalen tsaro da kare rayuka da dukiyoyin al’umma.
Kwamishinan ya bayyana cewa gwamnati ta bullo da tsare-tsare daban-daban domin ƙarfafa matakan tsaro, inganta haɗin gwiwa da masu ruwa da tsaki, da kuma dawo da zaman lafiya a al’ummomin da matsalar rashin tsaro ta shafa.
Ya bayyana cewa an sake buɗe wasu hanyoyi da kasuwanni da a baya aka rufe ko kuma aka kasa shiga cikinsu saboda matsalolin tsaro. Ya jaddada cewa dawo da damar amfani da waɗannan wurare yana da muhimmanci wajen farfado da harkokin tattalin arziki, zirga-zirgar jama’a da kuma dawo da rayuwar al’umma yadda aka saba.
Dr. Danmusa ya buƙaci mazauna jihar da su kasance cikin taka-tsantsan da lura da harkokin tsaro a kowane lokaci, yana mai jaddada cewa tsaro nauyin kowa ne, wanda ke buƙatar haɗin kan gwamnati, hukumomin tsaro, sarakunan gargajiya, shugabannin addini da sauran al’umma.
Ya yi kira ga jama’a da su riƙa kai rahoton duk wani motsi da ake zargi da kuma sahihan bayanan tsaro ga hukumomin da suka dace. Haka kuma, ya buƙaci malaman addinin Musulunci da su yi amfani da tasirinsu wajen hana tashin hankali, ƙarfafa zaman lafiya da kuma inganta haɗin kan jama’a da hukumomin tsaro.
A nasa jawabin, Shugaban gidauniyar Al-Asad Education Foundation, Sheikh Dr. Goni Muneer, ya bayyana cewa an shirya taron ne domin bai wa malaman addinin Musulunci a faɗin Jihar Katsina ilimi da shawarwarin da za su taimaka musu wajen bayar da gudunmawa mai inganci ga samar da zaman lafiya, wayar da kan jama’a kan tsaro da kuma jagoranci nagari na addini.
Ya bayyana cewa shugabannin addini suna da babban matsayi da tasiri a cikin al’umma, kuma za su iya taimakawa wajen daƙile rikice-rikice ta hanyar koyar da haƙuri da juriya, hana furta kalaman tunzura jama’a da kuma jagorantar mabiyansu bisa ingantattun koyarwar addini.
Sheikh Dr. Goni Muneer ya jaddada muhimmancin ci gaba da tuntuɓar malaman addinin Musulunci, yana mai cewa gudunmawarsu wajen wayar da kan jama’a da bayar da shawarwarin tarbiyya za ta taimaka wajen magance yaɗa bayanan ƙarya, ƙarfafa fahimtar juna da inganta zaman lafiya.
Haka kuma, Sheikh Dr. Atiku Balarabe Gusau ya gabatar da takarda kan illolin yaɗa jita-jita, inda ya bayyana irin mummunan sakamakon da yaɗa bayanan da ba a tantance sahihancinsu ba, kazafi da zarge-zargen karya za su iya haifarwa ga ɗaiɗaikun mutane da al’umma baki ɗaya.
Ya jaddada buƙatar Musulmi su riƙe gaskiya, su tabbatar da sahihancin bayanai kafin yaɗa su, tare da guje wa yaɗa zarge-zargen da za su iya ɓata mutuncin mutane, haifar da rashin amincewa ko haddasa rikici a tsakanin al’umma.
Shi ma Sheikh Imam Hassan Daura ya gabatar da lakca kan ƙa’idoji da nauyin da ke kan masu gabatar da wa’azi daga kan mimbari, inda ya jawo hankali kan wajibcin shugabannin addini na kyautata tarbiyyar mabiyansu.
Ya bayyana cewa ya kamata wa’azi ya ginu bisa ingantaccen ilimin addini, hikima da kuma magana cikin kulawa. Ya buƙaci malaman addinin Musulunci da su yi amfani da wuraren da suke wa’azi wajen ƙarfafa hadin kai, zaman lafiya da mutunta juna.
Sheikh Imam Safiyu Alkasim da Sheikh Imam Naziru Kafar Baru Daura sun gabatar da tsokaci kan takardun da aka gabatar, inda suka ƙara haske kan nauyin malaman addini wajen magance jita-jita, inganta fahimtar addini da ƙarfafa tsaro.
A nasa ɓangaren, kwamishinan harkokin addini, Hon. Alhaji Ishaq Shehu Dabai, ya gabatar da jawabin maraba, inda ya jaddada muhimmancin jagorancin addini wajen ƙarfafa kyawawan dabi’u, inganta zaman lafiya da juna da kuma magance matsalolin zamantakewa.
Ya bayyana cewa malaman addinin Musulunci suna da muhimmiyar rawar da za su taka wajen ilmantar da jama’a kan wajibai na addini, kyawawan halaye da kuma buƙatar kiyaye zaman lafiya da haɗin kai a yankunansu.
Kwamishinan ya yi kira da a ci gaba da ƙarfafa haɗin gwiwa tsakanin gwamnati da cibiyoyin addini, domin tabbatar da cewa koyarwar addini na ci gaba da taimakawa wajen wayar da kan jama’a, kyautata tarbiyya da samar da ɗorewar zaman lafiya a faɗin Jihar Katsina.
Daga cikin waɗanda suka halarci taron akwai shugaban ma’aikatan fadar gwamnatin Jihar Katsina, Hon. Abdulkadir Mamman Nasir; malaman addinin Musulunci; shugabannin addini; wakilan hukumomin gwamnati da abin ya shafa; da sauran masu ruwa da tsaki da suka duƙufa wajen inganta zaman lafiya, tsaro da shugabanci nagari na addini a Jihar Katsina.
