Daga BELLO ABUBAKAR BABAJI
An dakatar da ƴar wasan ‘boxing’ ta Nijeriya, Cynthia Ogunsemilore daga shiga gasar Olympics sakamakon gwajin ƙwayoyi da aka yi mata a ranar Asabar a yayin da ake cigaba da shirin wasanta na farko.
Hukumar gwajin ƙwayoyi ta ƙasa-da-ƙasa, ta ce bayan gwajin Cynthia an tabbatar cewa ta na shan maganin ‘furosemide wanda yana daga cikin ababan da hukumar ta haramta wa ƴan wasa.
Shafin ATI ya wallafa cewa, a halin yanzu an dakatar da ita har sai an warwara matsalar kamar yadda ya ke a cikin dokokin kwamitin gasar.
Sannan, hakan ya nuna cewa Cynthia ba za ta shiga gasar ko lamuran horarwa ko kowane irin aiki a Olympics ɗin shekarar nan da ake yi a Farisa ba.
ITA ya ce, ƴar wasan ta na da damar shigar da ƙara kotu gabanin fara wasan.
Haka nan, matakin ya ƙara rage adadin masu wakiltar Nijeriya a ɓangaren boxing na gasar inda Adam Olaure ne ƙadai wanda ake sa ran zai samo nasara wa Nijeriya a halin yanzu.
