Daga BELLO A. BABAJI a Abuja
Juriya, haƙuri da jagoranci na haɗa kowa da kowa na Shugaban Jam’iyyar APC na Ƙasa, Farfesa Nentawe Yilwatda ne ginshiƙin da jam’iyyar ta dogara da su wajen ƙarfafa matsayinta na jam’iyya mafi yawan jama’a a Nijeriya.
Darakta na Kuɗi na Hadejia Jama’are River Basin, Dr. Musa Illiyasu Kwankwaso ne ya bayyana haka yayin da yake taya Shugaban Jam’iyyar APC na Ƙasa, Farfesa Nentawe Goshen Yilwatda, murna a ranar cika shekaru 58 da haihuwa.
Dr. Musa Illiyasu Kwankwaso ya yaba da jajircewar Farfesa Yilwatda wajen ciyar da Shirin Sabon Bege na Shugaba Bola Ahmed Tinubu gaba, da kuma ƙoƙarinsa na haɓaka mulki nagari, ƙa’idodin dimokuraɗiyya da ci gaban ƙasa. Ya ce jam’iyyar ta riga ta tsaya a matsayin wadda za ta yi nasara a zaɓen gaba.
“A yau Shugaban yana tsaye a matsayin jagora mai sadaukarwa wanda gudunmawar sa ga ci gaba da ƙarfafa APC ke ci gaba da haɓaka haɗin kai, haɗa kowa da kowa da dimokuraɗiyya ta ciki a cikin jam’iyyar.”
Kwankwaso ya ƙara da cewa ƙoƙarin Yilwatda na ƙarfafa tsarin jam’iyyar, faɗaɗa tushen mambobi da kuma tsara ta don samun nasara ta zaɓe, ya riga ya haifar da sakamako mai kyau, inda kusan dukkan Gwamnonin Najeriya yanzu suna cikin jam’iyyar.
Ya yi addu’ar cewa Allah ya ba Shugaban Jam’iyyar APC na Ƙasa ƙarin shekaru masu yawa cikin koshin lafiya, hikima da ƙarfi, tare da fatan ci gaba da nasara a hidimarsa ga jam’iyya da ƙasa.
Musa Illiyasu Kwankwaso ya kuma tabbatar da cewa a Arewa, Shugaban Jam’iyyar ya kamata ya kwanta da bacci ya rufe ido, domin ‘yan Arewa sun yarda bisa tushen mulki nagari na Shugaba Tinubu cewa za su kada kuri’a da yawa ga shi da duk sauran ‘yan takar jam’iyyar.
Ya ƙara da cewa a Kano, Gwamna Abba Kabir Yusuf da dukkan ‘yan takar Sanata guda uku, ‘yan Majalisar Wakilai da ‘yan Majalisar Jiha za su tabbatar da samun nasara. Ya kuma gode wa Shugaban Jam’iyyar APC na Ƙasa kan hikimar sa na kiyaye jam’iyyar a matsayin gida ɗaya.
