Daga ABUBAKAR A BOLARI Gombe
Gwamnan Jihar Gombe, Muhammadu Inuwa Yahaya, ya kafa kwamitin da zai kula da tantancewa da rabon kadarori da basussuka tsakanin ƙananan hukumomi 11 da sabbin gundumomin yanki 13 da aka ƙirƙira a jihar, wanda ya kai adadin yankunan gudanarwar da abin ya shafa zuwa 24.
Kwamishinan ƙananan hukumomi da bunƙasa al’umma na jihar, Barr. Sani Ahmad Haruna, ne ya bayyana hakan yayin ganawa da mambobin kwamitin.
Haruna ya yaba wa gwamnan bisa kafa kwamitin, yana mai cewa matakin zai taimaka wajen tabbatar da an gudanar da rabon kadarori da basussukan da suka shafi tsofaffin ƙananan hukumomi da sabbin yankunan cikin gaskiya da adalci.
Ya ce aikin kwamitin zai samar da sahihan bayanai kan kadarori da basussukan da suka shafi kowane yanki, tare da kafa ingantaccen tsari na kula da dukiyar gwamnati da ƙarfafa riƙon amana a matakin ƙananan hukumomi.
Kwamishinan ya buƙaci babban mai ba da shawara kan aikin, Dr Bala Auta, da sauran mambobin kwamitin su gudanar da aikinsu cikin ƙwarewa, gaskiya da kishin al’umma.
Ya bayyana cewa gwamnan ya ɗora musu wannan nauyi ne bisa amincewa da ƙwarewarsu, yana mai fatan za su gudanar da aikin yadda ya kamata domin amfanin jihar da yankunan da abin ya shafa.
Haruna ya ƙara da cewa an tura kwamitin zuwa yankunan sanatan jihar guda uku domin sauƙaƙa gudanar da aikin da tabbatar da an bi tsarin da ya dace.
A nasa jawabin, Dr Bala Auta ya tabbatar wa gwamnatin jihar da al’ummar Gombe cewa kwamitin zai gudanar da aikin cikin gaskiya, himma da ƙwarewa.
Ya ce za su tabbatar da tattara sahihan bayanai tare da kiyaye muradun tsofaffin ƙananan hukumomi da sabbin yankunan da aka ƙirƙira.
Auta ya kuma gode wa ma’aikatar ƙananan hukumomi da bunƙasa al’umma bisa goyon baya da yanayin aiki mai kyau da ta samar domin gudanar da aikin.
Ana sa ran aikin zai fayyace kadarori da basussukan da suka shafi yankunan gudanarwa 24, tare da samar da ginshiƙi na rabon dukiyar gwamnati cikin adalci da inganta gaskiya da riƙon amana a harkokin ƙananan hukumomi a Jihar Gombe.
