Daga MAHDI MUSA MUHAMMAD
Gwamnatin Jihar Kano ta fara rusa wasu haramtattun gine-gine da aka gina a filayen gwamnati a faɗin jihar.
Wannan matakin da rundunar ‘yan sandan jihar Kano ke jagoranta, ya shafi gine-ginen da aka gina ba tare da izinin zama a kan kadarorin gwamnati ba.
Da yake jawabi a ranar Laraba a birnin Kwankwasiyya, sakataren kwamitin, Hameed Sidi, ya ce matakin wani ɓangare ne na ƙoƙarin da jihar ke yi na kwatowa da kuma kiyaye haƙƙin al’umma domin samun ci gaba.
Sidi ya bayyana cewa kwamitin ya gano sama da 10 na haramtattun gine-gine a birnin na Kwankwasiyya.
Ya ce, rundunar za ta mayar da hankali ne kan wuraren da aka gano a matsayin wuraren da ake yin gine-gine ba tare da izini ba.
Sidi ya ce an baiwa masu kadarorin da abin ya shafa isassun sanarwar ficewa daga wuraren kafin a fara rusa ginin.
Sakataren ya yi gargaɗin cewa za a ci gaba da gudanar da aikin har sai an kawar da duk wani abu da ya shafi cin hanci da rashawa, yana mai jaddada bukatar bin dokokin amfani da filaye.
“Mun himmatu wajen maido da oda da kuma tabbatar da cewa an yi amfani da filayen jama’a don manufar da aka yi niyya,” in ji sakataren.
Ya buƙaci mazauna yankin da su ziyarci ma’aikatar filaye da tsare-tsare don sabunta takardun mallakar filaye na da.
A cewarsa, sake tantancewar za ta tabbatar da daidaito da tsaron bayanan filaye, da kare saka hannun jari, da kuma taimakawa wajen warware takaddama.
Sakataren ya kuma yi kira ga masu mallakar filaye da su gaggauta bin wannan tsari.
Rundunar ta ruguje wani katafaren gida biyu a garin Guringawa da ke karamar hukumar Kumbotso, tare da kara nuna wasu filaye da gidaje don dakatar da gine-gine.
