An kama wata mata mai suna Bilkisu Sani a ƙaramar Hukumar Rogo ta Jihar Kano, bisa zargin kashe mijinta, Hafizu Gausu, wanda rahotanni suka ce yana shirin auren wata mata a matsayin ta biyu.
Wani mazaunin yankin, Auwal Kazagi Rogo, ya shaida wa manema labarai cewa lamarin ya faru ne da misalin ƙarfe 7 na yammacin Juma’a a yankin Katsalle da ke garin Rogo.
Ya ce, mazauna yankin sun garzaya wurin bayan sun ji ihun matar Gausu, wadda ta yi iƙirarin cewa an yanka mijinta.
“Da muka isa wurin, sai muka ga ba a yanka shi ba, an buga masa wani abu a kai. Ya faɗi cikin jini kuma ya mutu. Haka kuma an ga alamar cizo a kunnensa,” inji Kazagi.
Ya ƙara da cewa, an kira ’yan sanda nan take, inda daga bisani suka kwashe gawar domin gudanar da bincike.
Kazagi ya ce, ana zargin Gausu ya shiga wata sabuwar soyayya da wata mata, kuma yana shirin aurenta a matsayin matarsa ta biyu.
Ya ce, wannan shawara ta jawo yawan saɓani tsakanin Gausu da Bilkisu, wadda ake zargin ta yi alƙawarin hana auren.
A cewarsa, dattawan yankin sun taɓa shiga tsakani domin sasanta rikicin, amma rashin jituwar ta ci gaba.
Kazagi ya ce, ’yan sanda sun kama Bilkisu a matsayin babbar wadda ake zargi da hannu a kisan, yayin da bincike ke ci gaba da gano ainihin abin da ya faru.
An binne marigayin a safiyar Asabar a garin Rogo bisa tsarin jana’izar Musulunci.
Ma’auratan sun shafe kusan shekaru bakwai da aure, kuma suna da ’ya’ya biyu. Rahotanni sun ce Bilkisu tana da ciki a lokacin mutuwar mijinta.
Majiyoyin yankin sun kuma ce Gausu ya nemi iyalan wadda yake shirin aura da su kawo ranar ɗaurin auren gaba da watanni biyu saboda adawar da matarsa ke yi da auren.
