Daga USMAN KAROFI
Shugaban ƙasa Bola Ahmed Tinubu ya naɗa Joseph Olasunkanmi Tegbe a matsayin sabon ministan wutar lantarki, inda ya aika sunansa ga majalisar dattawa domin tantancewa da amincewa. Wannan naɗin ya biyo bayan murabus ɗin tsohon ministan, Adebayo Adelabu, wanda ya sauka daga muƙaminsa domin neman wata kujera ta zaɓe.
Tegbe, ɗan asalin Jihar Oyo, ƙwararre ne a fannin tattalin arziki da gyaran tsare-tsare, tare da gogewar sama da shekaru 35 a ɓangarorin gwamnati da masu zaman kansu. Ya taɓa zama babban abokin hulɗa kuma shugaban sashen ba da shawara a KPMG Africa, inda ya jagoranci shirye-shiryen gyaran manufofi da inganta hukumomi.
A halin yanzu, shi ne Darakta Janar kuma mai kula da hulɗar duniya na Nigeria-China Strategic Partnership. Haka kuma ya taka rawa a ɓangaren wutar lantarki, musamman wajen aiki da hukumomi kamar Nigerian Electricity Regulatory Commission da Nigerian Bulk Electricity Trading Company, domin inganta dokoki da tsarin aiki a fannin. Ana sa ran cewa idan aka amince da shi, zai taimaka wajen gyara harkar wutar lantarki da jawo zuba jari mai ɗorewa.
