Wani lamari mai ban mamaki ya faru a ƙasar Indiya bayan wani tsohon jami’in soji mai ritaya ya shirya jana’izarsa alhali yana raye, domin ya gano mutanen da za su halarci jana’izarsa idan ya mutu.
Rahotanni sun bayyana cewa mutumin mai shekaru 74, mai suna Mohan Lal, ya shirya dukkan al’adun jana’iza a ƙauyensu da ke jihar Bihar. An gudanar da addu’o’i, taron makoki da sauran shirye-shiryen jana’iza kamar yadda ake yi ga mamaci na gaske.
Daruruwan mutane sun halarci taron ba tare da sun san cewa wanda ake yi wa jana’izar yana raye ba. Wasu daga cikin mahalarta taron sun zo ne domin nuna alhini da girmamawa ga wanda suka yi zaton ya rasu.
Sai dai a daidai lokacin da ake shirin kammala jana’izar, mutumin ya bayyana a gaban mahalarta taron, lamarin da ya girgiza mutane tare da jefa su cikin mamaki. Wasu sun kasa gaskata abin da idanunsu ke gani, yayin da wasu suka bayyana lamarin a matsayin abin dariya da darasi a lokaci guda.
Da yake bayani kan dalilin yin hakan, Mohan Lal ya ce yana son ya ga waɗanda suke ƙaunarsa da gaske da kuma waɗanda za su zo su yi masa bankwana idan ya mutu. Ya kuma yi kira ga mutane su riƙa nuna ƙauna da kulawa ga ‘yan uwansu tun suna raye maimakon jira sai bayan rasuwarsu.
Lamarin ya bazu sosai a kafafen sada zumunta, inda mutane suka riƙa muhawara kan ko matakin da ya ɗauka ya dace ko a’a, yayin da wasu suka ce ya nuna yadda mutane ke yawan yabon mamaci bayan mutuwarsa fiye da lokacin da yake raye.
