Daga MAHDI MUSA MUHAMMAD
Bankin FirstBank a Nijeriya (FBN) ya kori ma’aikata kusan 100 daga aiki a wani gagarumin shiri na sauya fasalin banki.
Kamar yadda Nairametrics ta ruwaito, wata majiya mai tushe da ke da masaniyar lamarin kai tsaye ta ce an buƙaci wasu manyan jami’an bankin da su bar aiki a matsayin wani ɓangare na shirinsa na sake fasalin bankin na shekarar 2025 – biyo bayan tabbatar da Olusegun Alebiosu a matsayin Manajan Darakta na FBN (MD) kuma babban jami’in gudanarwa (CEO) a watan Yuni.
Majiyoyin sun shaida wa jaridar cewa da alama korar na daga cikin ƙoƙarin da hukumar Femi Otedola, shugabanta ke yi na ɗaukar sabbin ma’aikata da canja ragamar tafiyar da bankin.
Wata majiya a cikin bankin ta nuna cewa wasu daga cikin ficewar na son rai ne, musamman ga manyan jami’an da ke ƙwarewar aikin gyara bankin.
Haka kuma an fahimci cewa ficewar sun haɗa da fitaccen daraktan gudanarwa wanda ba a sabunta wa’adinsa ba bisa wasu yanayi.
Bayanai daga gidan yanar gizon bankin sun nuna cewa yana da kusan mambobi 13 a cikin tawagar zartaswar sa, da manyan manajoji shida, mataimakan manyan manajoji 33, da mataimakan manyan manajoji 37.
FirstBank yana fuskantar gagarumin koma-baya a fannin gudanarwa tun lokacin da Femi Otedola ya zama shugaban kamfanin.
Ficewar sabbin shugabannin a FirstBank ya biyo bayan wasu muhimman sauye-sauyen da aka samu a farkon shekarar 2024, yayin da hamshaƙin attajirin nan Femi Otedola ya karɓi ragamar shugabancin bankin na FBN.
