Daga BELLO ABUBAKAR BABAJI
A ranar Talata ne waɗanda su ka shirya zanga-zangar ‘EndBadGovernance’ da za a yi a watan Agusta su ka ƙi amincewa da buƙatar Sufeton ‘Yan sanda, Kayode Egbetokun, ta neman su gudanar da ita a keɓaɓɓun wurare madadin fitowa kan tituna.
Hakan na zuwa ne yayin da ake cigaba da tsare-tsaren yadda zanga-zangar za ta gudana, a wani zama da aka yi da jagororin tafiyar da rundunar ƴan sandan.
Egbetokun ya ce “ba dai-dai ba ne a yi gangami a kan titi da nufin yin zanga-zanga. Wasu kuma na shirya yin tashin-tashina”.
Lauya Ebun-Olu Adegboruwa (SAN) da ke kare tawagar ‘Take it Back Movement’, ɗaya daga cikin waɗanda ke shirya zanga-zangar, ya ce ba su amince da buƙatar Sufeton ba.
A ranar 26 ga watan Yuli ne Adegboruwa ya rubuta takarda ga Sufeton wacce a ciki ya nemi da ya samar da tsaro na dakarun rundunar ‘Yan sanda ga masu zanga-zangar.
Rundunar ‘Yan sanda da na soji da kuma ƴan sandan farin kaya ta DSS sun gargaɗi al’umma kan irin yadda ta faru a ƙasar Kenya.
Duk da cewa ƴan siyasa sun yi ta rarrashin masu zanga-zangar tare da buga misali da yadda ya faru lokacin ‘EndSars’ a Oktoban 2020 wajen ganin an janye daga batun yin zanga-zangar, amma matasan sun tirje, su na masu haƙiƙancewa sai sun yi.
