Daga USMAN KAROFI
Ɗan wasan tsakiya na Manchester City kuma kyaftin din tawagar ƙasar Spain, Rodri, zai shiga tiyatar baya a ranar Litinin, kamar yadda sabon kocin ƙungiyar, Enzo Maresca, ya tabbatar. Wannan na zuwa ne bayan Rodri ya taka muhimmiyar rawa wajen jagorantar Sifaniya zuwa lashe Kofin Duniya, inda kuma aka ba shi lambar gwarzon gasar.
Rodri mai shekaru 30 ya sha fama da raunuka a shekarun baya-bayan nan. A kakar 2024/25, ya yi jinyar dogon lokaci sakamakon raunin jijiyar gwiwa (ACL), sannan wasu ƙarin raunuka suka rage masa yawan buga wasanni a kakar da ta gabata. Duk da haka, ya dawo cikin ƙoshin lafiya kafin gasar Kofin Duniya kuma ya taka rawar gani.
Kocin Manchester City, Enzo Maresca, ya ce a halin yanzu abin da ya fi muhimmanci shi ne Rodri ya samu hutu, ya yi tiyata sannan ya kammala jinyarsa kafin ya koma cikin tawagar. Sai dai kocin bai bayyana ranar da ake sa ran ɗan wasan zai dawo fili ba. Haka kuma, ya yi watsi da rahotannin da ke alaƙanta Rodri da komawa Real Madrid, yana mai cewa irin waɗannan jita-jita abu ne da ake yawan ji game da fitattun ‘yan wasa.
Maresca ya kuma bayyana cewa yawancin ‘yan wasan da ba sa tare da ƙungiyar a yanzu za su dawo kwanaki kaɗan kafin Manchester City ta kara da Arsenal a wasan Community Shield ranar 16 ga Agusta. A jawabinsa na farko tun bayan maye gurbin Pep Guardiola, Maresca ya ce babban abin alfahari ne a gare shi ya jagoranci ƙungiyar bayan ya yi aiki a matsayin mataimakin Guardiola a lokacin da Manchester City ta lashe kofuna uku a kakar 2022/23.
