Daga MAHDI MUSA MUHAMMAD
Hukumar Kula da Wutar Lantarki ta Nijeriya (TCN), ta bayyana cewa an lalata manyan turakun wutar lantarki sama da 18 a jihohin Ribas, Abiya, da Kano tsakanin ranakun 9 zuwa 14 ga watan Janairu, 2025.
A Jihar Ribas, an lalata turakun wutar lantarki da ke kan layin Owerri/Ahoada 132kv, yayin da a Abiya aka sace wasu manyan wayoyi da wasu sassan gine-gine na turakun da ake yi wa gyare-gyare.
Haka kuma, a Kano, ɓata-gari sun lalata turakun da ke kan layin Katsina zuwa Gazoua mai nauyin 132/33kv.
Hakazalika, a Abuja, an gano an lalata wayoyin da ke ƙarƙashin ƙasa na wutar lantarki a ranar 17 ga watan Janairu, wanda ya kawo tsaikon ɗauke wutar lantarki a yankunan birnin.
Mai magana da yawun TCN, Ndidi Mbah, ta bayyana wannan matsalar a matsayin babbar barazana ga ci gaban wutar lantarki.
Ta roƙi al’umma da su taimaka wajen kare waɗannan kayayyaki domin amfanin kansu da gwamnati.
Ta jaddada cewa hanyoyin wutar lantarki na da matuƙar muhimmanci ga cigaban ƙasa, don haka kowa ya taimaka wajen magance wannan matsala.
“Waɗannan al’amuran suna haifar da babban ƙalubale ga ayyukan TCN a matsayin kamfani,” inji ta.
Ta ce, kamfanin ya ƙarfafa matakan tsaro, da ƙara sintiri na layuka da kuma yawan ƙungiyoyin ’yan banga, sannan yana haɗa kai da jami’an tsaro.
Ms Mbah ta ce kamfanin yana neman cikakken goyon bayan kowane ɗan Nijeriya, musamman waɗanda ke cikin al’ummomin da ke ɗaukar nauyin na’urorin TCN.
“Dole ne ‘yan Nijeriya baki ɗaya su gane cewa hanyar sadarwa ita ce kadarorinmu kuma yana da muhimmanci ga ci gaban tattalin arzikinmu.
“Masu ɓarna da masu sayen kayan sata suna yiwa al’umma zagon ƙasa. Dole ne dukkan hannaye su tashi tsaye domin tabbatar da bunƙasar ɓangaren wutar lantarkin ƙasar nan, wanda ke da matuƙar muhimmanci ga ci gaban ƙasarmu.
“Shirye-shiryen faɗaɗa grid na TCN suna cikin wahala sosai saboda ci gaba da lalata kayan aikinta,” inji ta.
Ta ce illolin kuɗi na gyare-gyare akai-akai ga na’urorin watsa shirye-shiryen da suka lalace, tare da damuwa a kan grid, suna da illa ga haɓaka grid na TCNs.
“Wannan kira ne ga kowa da kowa ya haɗa ƙarfi da ƙarfe da TCN don kawo ƙarshen wannan barazana da kuma kare hanyar lantarkinmu” inji Mbah.
