Daga BELLO A. BABAJI
Tsohon Ministan Sufuri, Rotimi Amaechi ya bayyana yadda Ubangiji ya tsare shi a wata tafiya daga Kano zuwa Kaduna lokacin da ya ke gyangyaɗi a yayin tuƙi.
Ya ce, lamarin ya faru ne bayan da shi da wasu sun kammala ƙaddamar da naɗin wani sarki a Kano da bai bayyana sunansa ba.
Tsohon gwamnan na Jihar Ribas ya kuma ce, akwai Goje da Baraje da kuma Farfesa Gambari a lokacin da ya tuƙo motar daga Kano.
Amaechi ya bayyana hakan ne a yayin taron Gidauniyar Akinjide Adeosun na shekara-shekara da ya gudana a Legas karo na tara .
Ya bayyana cewa, bayan naɗin Sarkin ne, Shugaban Hukumar Ƴan sandan Farin kaya (DSS) a jihar, ya gargaɗe shi da ya fice daga jihar sakamakon akwai barazanar tsaro game zamansa lafiya.
A yunƙurinsa na ficewar ne ta jirgin sama, sai aka faɗa masa cewa an bada umarnin kada a sayar masa da tikitin jirgi sama, lamarin da ya sa ya tuƙo motar.
Ya ƙara da cewa, a lokacin da ya iso Zariya ne sai ya samu damar fitowa don ya kama ruwa, inda daga nan ne suka cigaba da tafiya har zuwa Kaduna, sannan ya samu sararawa.
