Daga ABDULLAHI MUHAMMAD a Katsina
Ƙungiyoyin malamai da ma’aikatan Jami’ar Ummaru Musa Yar’adua (UMYU) a Katsina sun tsunduma yajin aiki “sai badba ta gani” daga yau Litinin, 3 ga watan Nuwamba.
Yajin aikin ya shafi dukkan malamai da ma’aikatan jami’ar, sakamakon wasu matsalolin da suke zargin gwamnati ta yi biris da su.
Daga cikin ƙorafe-ƙorafen da suka gabatar sun haɗa da; Rashin ingantaccen jin daɗin ma’aikatan jami’ar, Matsalar ƙwace ikon gudanar da shafin (portal) na makaranta.
Sauran sun haɗa da ƙarancin kuɗaɗen gudanarwa, da kuma batun walwalar ɗalibai.
Sai dai a nata ɓangaren, Gwamnatin Jihar Katsina ta yi watsi da ƙorafe-ƙorafen ƙungiyar, tare da jaddada cewa tana ci gaba da ƙoƙarin magance dukkan matsalolin da suka shafi jami’ar da cigaban ilimi a jihar.
