Daga IBRAHIM HAMISU a Kano
Shugabannin Jam’iyyar NNPP na mazaɓar Gargari da ke ƙaramar hukumar Dawakin Tofa a Jihar Kano sun sanar da korar shugaban jam’iyyar na jihar, Dr. Hashimu Sulaiman Dungurawa.
Ya ce sun ɗauki matakin ne bisa zargin cewa Dungurawa na tada fitina, korar muhimman ’ya’yan jam’iyya ba bisa ƙa’ida ba, da kuma zagin Gwamnan Kano, Engr. Abba Kabir Yusuf.
Shugaban jam’iyyar na mazaɓar, Shu’aibu Hassan, ne ya bayyana hakan yayin wani taron manema labarai a safiyar yau Talata.
Kazalika, sun zarge shi da ƙin halartar tarukan masu ruwa da tsaki na ƙaramar hukumar, tare da zargin sa da yi wa jam’iyyar zagon ƙasa.
Shugabannin jam’iyyar sun ce ɗaukar wannan mataki ya zama dole domin kare martaba, tsari da mutuncin jam’iyyar NNPP a yankin.
Lamarin dai na zuwa ne a daidai lokacin da jam’iyyar NNPP ke fuskantar rikicin cikin gida, musamman dangane da raɗe-raɗin sauya sheƙar Gwamnan Kano zuwa jam’iyyar APC.
