Daga SANI AHMAD GIWA a Abuja
Ministan Babban Birnin Tarayya (FCT), Nyesom Wike, ya bayyana cewa zai yi murabus daga mukaminsa na minista idan Shugaba Bola Ahmed Tinubu ya gaza samun nasara a Babban Birnin Tarayya (FCT) da Jihar Ribas a zaɓen shugaban ƙasa na 2027.
Wike ya bayyana hakan ne a yayin wata ganawa da shugabanni da mambobin ƙungiyar Masu Gyaran Motoci da ’Yan Kasuwa ta Apo a Abuja, inda ya danganta ci gaba da kasancewarsa a matsayin minista da nasarar da zai samu wajen samar da sakamakon siyasa ga Shugaba Tinubu a wuraren da yake da tasiri.
A cikin wata sanarwa da Babban Mataimaki na Musamman ga ministan kan Hulɗa da Jama’a da Kafofin Sadarwa na Zamani, Lere Olayinka, ya fitar a ranar Laraba, Wike ya ce ya sanya wa kansa takamaiman lokacin da zai yi murabus.
Ya ce idan jam’iyyar da ke mulki ta sha kaye a FCT da Jihar Ribas a zaɓen shugaban ƙasa da aka tsara gudanarwa a ranar 16 ga Janairu, 2027, zai gabatar da takardar murabus ɗinsa washegari, wato 17 ga Janairu, 2027. Jadawalin INEC na yanzu ya tabbatar da cewa zaɓen shugaban ƙasa da na Majalisar Dokoki ta ƙasa zai gudana ne a ranar 16 ga Janairu, 2027.
Wike ya ce, “Idan ba zan iya kawo nasara a inda nake aiki ba, to ban cancanci kasancewa a nan ba,” yana mai jaddada cewa nasarar siyasa na daga cikin abin da zai nuna cancantar ci gaba da riƙe mukaminsa.
Ya ƙara da cewa, “Idan na rasa FCT, bai kamata in kasance Ministan FCT ba. Zuwa 17 ga Janairu, 2027, zan sanar da murabus ɗina a matsayin Ministan FCT idan Shugaban ƙasa ya sha kaye a Jihar Ribas da FCT.”
Da yake bayyana dabararsa ta siyasa a FCT, Wike ya ce ana gina wata ƙawancen jam’iyyu da dama domin samun nasara a zaɓukan mukamai daban-daban a yankin.
Ya kuma bayyana goyon bayansa ga ’yan takara a matakai daban-daban na majalisar dokoki, tare da sake jaddada cikakken goyon bayansa ga ƙoƙarin Shugaba Tinubu na neman wa’adi na biyu.
Wike ya ce, “Mu fayyace inda muka dosa: a Shugabancin ƙasa, Bola Ahmed Tinubu ne! A Majalisar Dattawa kuma, Philip Aduda mutum ne na jama’a, ba kamar waɗanda ke fitowa talabijin kawai ba. ’Yan takarar Majalisar Wakilai biyu da muke goyon baya su ma suna nan. Tsoffin shugabannin ƙananan hukumomi ne.”
Ya ƙara da cewa, “A FCT, muna gudanar da haɗin gwiwar jam’iyyu daban-daban domin samun sakamakon da muke so.”
Wike ya kuma ce, “Idan ba zan iya kawo nasara a FCT a matsayina na minista ba, to ban cancanci riƙe wannan mukami ba. Muna da ƙaƙƙarfan yarjejeniya, kuma yau ne ranar tabbatar da ita a ƙarshe.”
Wannan furucin na Wike ya zo ne a daidai lokacin da ayyukan siyasa ke ƙara ƙamari gabanin zaɓen shugaban ƙasa na 2027. Ministan ya sha bayyana cewa babban abin da ya sanya a gaba shi ne tabbatar da nasarar Shugaba Tinubu a wuraren da ya bayyana a matsayin muhimman wuraren da yake da alaƙar siyasa da su, wato Jihar Ribas da Babban Birnin Tarayya.
