Daga ABDULLAHI MUHAMMAD a Katsina
Ƙungiyar Ansaru, mai alaƙa da ƙungiyar Al-Qaeda, ta ɗauki alhakin kashe Mallam Yahaya Masussuka, inda ta zarge shi da kasancewa kafiri.
Kamar yadda sananne mai sharhi kan tsaro Barista Audu Bulama ya ruwaito,ƙungiyar ta tabbatar da ɗaukar alhakin kisan ne a wani saƙon murya da ta fitar a yau. A cikin saƙon, Ansaru ta ce ta kai harin ne da misalin ƙarfe 8:30 na dare.
Mai magana a cikin saƙon ya ambaci cewa harin ya faru ne ranar Talata, amma hakan na iya zama kuskure, domin lamarin ya faru ne ranar Litinin.
Ansaru ta zargi Sheikh Yahaya Masussuka da adawa da Musulunci, amma ba ta bayyana wani takamaiman laifi da ya aikata ba. Sai dai, saƙon ya nuna cewa matsayinsa na ƙarfafa tattaunawa tsakanin mabiya addinai daban-daban da kuma zaman lafiya na iya kasancewa cikin abubuwan da suka jawo harin.
Ansaru ta ɓalle daga ƙungiyar Boko Haram a shekarar 2012 sakamakon rashin jituwa da shugabancin Abubakar Shekau. Tun daga lokacin, ƙungiyar ta gudanar da ayyukanta musamman a Arewa maso Yamma, ciki har da jihohin Zamfara, Kaduna da Neja.
Ba abin mamaki ba ne a ce Ansaru da hannu a wannan hari, duba da cewa Malam Masussuka na shirin gudanar da wani babban taron zaman lafiya. Wannan na iya zama ɗaya daga cikin dalilan da suka sa ya zama abin hari, ganin yadda ƙungiyar ke adawa da zaman lafiya da zaman tare tsakanin mabiya addinai daban-daban.
