Daga AISHA ASAS
Rahotanni da suka bazu cikin gaggawa a kafafen sada zumunta sun jefa dubban masoya fina-finai cikin ruɗani da jimami bayan wasu bayanai sun yi iƙirarin cewa fitaccen jarumin fina-finan Nollywood, Alex Ekubo, ya rasu yana da shekaru 40 a duniya.
Jita-jitar ta fara ɗaukar hankali ne bayan wani saƙo da fitaccen jarumi Godwin Nnadiekwe ya wallafa a shafinsa na Instagram, inda ya bayyana matuƙar kaɗuwa da alhini kan wani “mummunan labari” da ya ce ya samu. A cikin saƙon, ya bayyana Ekubo a matsayin baiwar da ba kasafai ake samu irinta ba a masana’antar Nollywood, yana mai nuna cewa har yanzu yana cikin yanayin rashin gaskata abin da ake yaɗawa.
Cikin ɗan ƙanƙanin lokaci, saƙon ya bazu tamkar wutar daji a soshiyal midiya, lamarin da ya haddasa martani masu tarin yawa daga masoya fina-finai, abokan sana’a da sauran masu ruwa da tsaki a harkar nishaɗi. Wasu sun bayyana jimaminsu tare da wallafa saƙonnin ta’aziyya da addu’o’i, yayin da wasu kuma suka roƙi jama’a da su yi taka-tsantsan wajen yaɗa bayanan da ba a tabbatar da su ba.
Masoyan jarumin sun fara tuna irin gudunmawar da ya bayar a Nollywood tsawon shekaru, musamman yadda ya kasance ɗaya daga cikin jaruman da suka yi fice wajen fina-finan soyayya da na zamani. Sun bayyana shi a matsayin mutum mai farin jini, natsuwa da kuma iya mu’amala da jama’a, abin da ya sa yake da dumbin magoya baya a Najeriya da ma ƙasashen waje.
Sai dai duk da yaɗuwar rahoton, har zuwa lokacin haɗa wannan rahoto babu wata sanarwa ta hukuma daga iyalansa, manajojinsa ko manyan hukumomin masana’antar fina-finai da ta tabbatar da mutuwar tasa. Rashin wannan tabbatacciyar shaida ne ya sa mutane da dama suka fara kira ga kafafen yaɗa labarai da su guji gaggawar wallafa bayanan da ba a tabbatar da su ba.
Masu lura da harkokin nishaɗi sun ce irin wannan lamari na nuna yadda soshiyal midiya ke iya tayar da hankalin jama’a cikin sauri, musamman idan rahoton ya shafi fitattun mutane. Sun kuma yi kira da a riƙa jira kafin hukumomi ko iyalai su fitar da cikakken bayani domin kauce wa haddasa firgici da tashin hankali ga magoya baya da iyalan wanda abin ya shafa.
A shekarun baya-bayan nan dai masana’antar Nollywood ta fuskanci rasa wasu fitattun jarumai da masu shirya fina-finai, lamarin da ya ci gaba da haifar da damuwa game da lafiyar masu sana’ar da kuma irin kulawar jin daɗin rayuwarsu. A shekarar 2025 ma an rasa wasu fitattun mutane da suka haɗa da jaruma Allwell Ademola da kuma jarumi Columbus Irosanga, abin da ya sake tayar da muhawara kan tallafin lafiya da walwalar masu harkar nishaɗi.
Yanzu haka dai hankulan mutane sun karkata ne wajen jiran sahihin bayani daga iyalai ko hukumomin da suka dace dangane da rahoton da ake yaɗawa kan Alex Ekubo, yayin da dubban magoya bayansa ke ci gaba da fatan cewa labarin ba gaskiya ba ne.
