Daga AISHA ASAS
A ranar 8 Disamba 2025, Dayo Amusa, fitacciyar ‘yar fim daga Najeriya, ta samu nasarar zama National Vice President ta Actors Guild of Nigeria (AGN) a zaɓen ƙarshe da aka gudanar a Benin, na Jihar Edo. Wannan mataki ya nuna sabon salo a harkar shugabanci a masana’antar Nollywood, inda ake neman gyara, tsari da inganta harkokin fina-finai a kasa baki ɗaya.
Dayo Amusa ta bayyana wannan matsayin a matsayin alamar amincewa da ƙoƙarin ta, tare da tabbatar da cewa zata yi aiki tuƙuru domin ganin ‘yan fim sun samu kariya, horo, da dama don ci gaba a harkokin su.
“Zaɓen da aka yi min babban lamari ne, amma ina fatan in zama jagora mai amfani ga kowa a masana’antar,” inji ta.
Zabin Dayo Amusa ya nuna cewa AGN na neman sabbin dabaru da kyakkyawan shugabanci tare da nuna muhimmacin mata a tafiyar da kuma samar da daidaito a tsakanin mata da mazan cikin masana’antar.
Dayo Amusa ta ƙara nuna cewa mata na da muhimmiyar rawa a Nollywood, ba kawai a matsayin ‘yan fim ba, har ma a matsayin shugabanni masu tasiri. Wannan zai ƙara ƙarfin gwiwa ga sauran mata da su jajirce don ganin sun kai inda suke mafarkin zuwa.
Masu shirya fina-finai da masana’antu da dama suna kallon wannan zaɓe a matsayin sabuwar dama domin haɗin gwiwa da AGN, samun shawarwari masu amfani, da tabbatar da cewa fim da ‘yan fim suna tafiya bisa doka da tsarin da ya dace.
