Daga RABIU SANUSI a Kano
Gwamnan Jihar Kano, Alhaji Abba Kabir Yusuf, ya jagoranci wata tawaga mai ƙarfi zuwa tarukan Mauludin Annabi Muhammad (SAW) da aka gudanar a sassa daban-daban na jihar, a wani mataki da ya ƙara nuna muhimmancin da gwamnatinsa ke bai wa hulɗa da malaman addinin Musulunci da al’ummomin jihar.
Gwamnan ya bar Fadar Gwamnatin Jihar Kano da misalin ƙarfe 10:00 na dare, inda ya fara rangadin tarukan Mauludi daban-daban tare da ci gaba da ziyartar wurare har tsawon dare, kafin ya dawo Fadar Gwamnatin da misalin ƙarfe 7:02 na safiya.
A cikin wannan rangadi na dare, Gwamna Abba Kabir Yusuf ya halarci tarukan Mauludi guda takwas da aka gudanar ƙarƙashin jagorancin Sheikh Sharif Sani Jambulo, Gidan ƙadiriyya, Sheikh Maihula, Sheikh Aliyu Harazimi, Sheikh Malam Kamaluddeen Adamu Nama’aji Alfindiki, Sheikh Atiku Sanka, Sheikh Mudi Salga da Sheikh Tiljani Yan Mota.
Gwamnan ya samu rakiyar manyan jami’an gwamnati da suka haɗa da Sakataren Gwamnatin Jihar Kano, Kwamishinonin Harkokin Addini, Lafiya, Ayyuka, Wutar Lantarki da Kananan Hukumomi, da kuma Mashawarta na Musamman kan Harkokin Addini, Harkokin Siyasa da Harkokin Jam’iyyu, tare da Hon. Bala Muhammad Gwagwarwa da sauran jami’an gwamnati.
Saboda yawan tarukan Mauludi da ake gudanarwa a wurare daban-daban a faɗin jihar, Gwamna Yusuf ya kuma wakilta Mataimakinsa, Alhaji Murtala Sule Garo, domin ya halarci wasu daga cikin tarukan a madadinsa.
Tawagar Mataimakin Gwamnan ta kai ziyara ga tarukan Mauludi da Sheikh Yusuf Makwarari, Malam Garba Maimandiri Tudun Nufawa, Sheikh Sani Kafinga, Gidan Baba Kusa, Sheikh Uba Mandawari, Sheikh Musa Kalla da Sheikh Dan Almajiri suka shirya.
Mataimakin Gwamnan ya samu rakiyar Shugaban Ma’aikatan Fadar Gwamnatin Jihar, Shugaban Jam’iyyar APC na Jihar Kano, da Kwamishinonin Yaɗa Labarai, Kiwo, Kuɗi, Albarkatun Ruwa da Muhalli, da Kasafi da Tsare-tsare, tare da Mashawarcin Musamman kan Harkokin Addini da Hon. Mukhtar Ishaƙ Yakasai.
Haka kuma, Gwamna Abba Kabir Yusuf ya wakilta Kakakin Majalisar Dokokin Jihar Kano, Rt. Hon. Jibril Ismail Falgore, domin ya wakilce shi a wasu ƙarin tarukan Mauludi da aka gudanar a sassan birnin Kano.
Tawagar Kakakin Majalisar ta ziyarci tarukan Mauludi na Malam Nasidi Goron Dutse, Sheikh Uwais Limanci, Sheikh Nazifi Alkarmawi, Zawiyyar Malam Hamza Gyaranya, Malam Yunusa Akwa, Malam Alhaji Maikasida Mazankwarai da Alhaji Kabiru Sani Kwangila.
Kakakin Majalisar ya samu rakiyar Kwamishinonin Raya Karkara, Gidaje, Ilimi, Bibiyar Ayyuka, Sufuri, Filaye da Tsare-tsaren Muhalli, da kuma Mashawarta na Musamman kan Harkokin Majalisa da Tsangaya, tare da Hon. Baffa Takai.
Wannan gagarumar halartar tarukan Mauludi da Gwamna Abba Kabir Yusuf da manyan jami’an da ya tura suka yi ta nuna ƙudirin gwamnatin jihar na ci gaba da ƙarfafa alaƙa da malaman addini, cibiyoyin addini da al’ummomin Kano.
Haka kuma, kasancewar gwamnatin jihar a irin waɗannan taruka na ƙara tabbatar da manufarta ta inganta zaman lafiya, haɗin kai da fahimtar juna tsakanin al’umma, tare da kasancewa kusa da jama’a a lokutan muhimman bukukuwan addini.
