Wata mata a jihar Florida da ke ƙasar Amurka ta jawo hankalin jama’a bayan ta yi artabu da wani babban kada domin ceton karenta daga bakin dabbar.
Rahotanni sun bayyana cewa lamarin ya faru ne a kusa da wani tafki yayin da matar ke yawo tare da karenta da safe. A cewar shaidu, kwatsam sai wani ƙaton kada ya fito daga ruwa ya cafke karen da bakinsa, lamarin da ya tayar da hankalin matar.
Ba tare da tsoro ba, matar ta yi gaggawar bin dabbar inda ta fara bugunta tare da ƙoƙarin buɗe bakin kadar domin kwato karenta.
Shaidu sun ce matar ta nuna jarumtaka matuƙa duk da haɗarin da ke tattare da kusantar irin wannan dabba mai hatsari.
Bayan ɗan lokaci na fafatawa, an ce matar ta samu nasarar sa kadar ya saki karen, kafin dabbar ta koma cikin ruwa. Duk da cewa karen ya samu raunuka, jami’an kula da dabbobi sun ce yana karɓar magani kuma yana cikin yanayi mai kyau.
Jami’an kula da namun daji a Florida sun yabawa matar saboda ƙoƙarin ceton dabbar tata, sai dai suka yi gargaɗin cewa kar da mutane su kuskura su kusanci kada idan ya kai hari saboda hatsarin da hakan ka iya jawowa.
Florida na daga cikin jihohin Amurka da ake yawan samun kada a tafkuna da koguna, kuma hukumomi kan sha jan hankalin jama’a da su guji yawo kusa da ruwa tare da dabbobinsu ba tare da kulawa ba.
Lamarin ya bazu sosai a kafafen sada zumunta inda mutane da dama suka bayyana matar a matsayin “jaruma” saboda yadda ta sadaukar da kanta wajen kare dabbar da take kiwo.
