Tare da BILKISU YUSUF ALI
Motsa jiki muhimmin al’amar ne, wanda kowa ya kamata ya riƙe wajibi ko farilla a rayuwa. Ana son kowa ya riƙi motsa jiki wani sashe na rayuwa ba tare da an kai jallin likita ya bayar da umarni ko dole ta janyo a yi, don wata larura ta musamman. Motsa jiki wani makami ne da ya kamata kowa ya riƙe a matsayin riga-kafi wanda Bahaushe ya ke cewa ya fi magani.
Amfanin motsa jiki
1. ƙarfafa zuciya da ingata bugun zuciya
Motsa jiki na taimakawa wajen rage haɗarin ciwon zuciya da hawan jini.
Nazarin masana ya nuna cewa mutum da ke motsa jiki akalla mintuna 30 a rana, sau 5 a mako yana rage haɗarin kamuwa da ciwon zuciya har zuwa kashi 20–30%.
2. Rage kiba da kula da nauyin jiki
Motsa jiki yana taimakawa wajen ƙone kitse da rage ƙiba.
Yana kuma inganta metabolism, wato yadda jiki ke amfani da abinci da makamashi yadda ya kamata.
3. Kariyar jiki daga cututtuka
Motsa jiki na rage haɗarin kamuwa da wasu cututtuka kamar:
Suga (Type 2 Diabetes)
Ciwon zuciya da jijiyoyin jini
Wasu cututtukan daji
4. ƙarfafa ƙasusuwan jiki da tsokoki
Yana inganta ƙarfi da lafiyar ƙasusuwa da tsokoki, musamman ga tsofaffi da mata masu shekaru.
Haka nan yana rage haɗarin faɗuwa da samun rauni.
5. Inganta lafiyar kwakwalwa da yanayin tunani
Motsa jiki na rage damuwa da baƙin ciki (depression) da tashin hankali (anɗiety).
Yana ƙara yawan endorphins, sinadarin da ke sa mutum jin daɗi da kwanciyar hankali.
6. Inganta tsarin numfashi da ƙarfin jiki
Wasanni kamar iyo, gudu, ko aerobics suna ƙara ƙarfin huhu da sauƙaƙa numfashi.
7.Kara tsawon rai da inganta rayuwa
Mutane masu motsa jiki akai-akai suna da damar rayuwa mai tsawo fiye da waɗanda ba sa motsa jiki. Haka nan motsa jiki na inganta ingancin rayuwa, saboda yana rage ciwo da gajiya.
Motsa jiki, yana da amfani sosai ga lafiyar jiki, kwakwalwa, da sauran sassan jiki ɗan’adam. Don haka al’umma gaba ɗaya ya kamata su san muhimmancin motsa jiki don su sanya shi a cikin al’amuran da suke gabatarwa yau da kullum. Masana kiwon lafiya sun tabbatar cewa motsa jiki yana rage cututtuka, yana ƙara ƙarfin jiki, inganta yanayin tunani, da ƙara tsawon rai. Don haka, motsa jiki ya zama tushen kiwon lafiya ga kowa da kowa.
