Daga MAHDI M. MUHAMMAD a Abuja
Gwamnatin Tarayya ta bayyana cewa, ta ɗauki ’yan sanda sama da 40,000 aiki a cikin shekaru huɗu da suka gabata domin magance matsalar rashin tsaro a ƙasar.
Shugaban ƙasa, Muhammadu Buhari ta bakin ministan harkokin ’yan sanda, Dokta Maigari Dingyadi, ne ya bayyana hakan a ranar Talata a garin Uyo na jihar Akwa Ibom, a wani taro da aka yi wa manyan jami’an ’yan sanda mai taken ‘Sabon hangen ’yan sanda, hanyar gyara tsaron ƙasa’.
Shugaban ya sanar da cewa, a ƙoƙarinsa na ƙara kwarin gwiwar jami’ai da kuma samar da ingantacciyar hidima ga ƙasa, ya gudanar da bitar albashi da alawus da matsayi tare da kafa kwamitin rundunar ’yan sanda kan tantance buƙatun ’yan sanda da ke ƙarƙashin jagorancin mataimakin shugaban ƙasa, Farfesa Yemi Osinbajo.
Shugaban, ya gode wa ƙungiyar gwamnonin Nijeriya bisa goyon bayan da suke bai wa ’yan sanda musamman gwamnatin jihar Akwa Ibom bisa karɓar baƙuncin taron.
Ya bayyana imanin cewa taron zai samar da wani sabon salo na aikin ’yan sanda da kuma samar da wani sabon salo na haɗin gwiwa kan abubuwan da ke barazana ga haɗin kai da zaman kamfanoni a Nijeriya.
Sufeto Janar na ’yan sandan Nijeriya, IGP Usman Alkali Baba, a jawabinsa na maraba, ya ce, jajircewar da jami’an suka yi za su dace da yanayin aikin ’yan sanda da na tsaro a cikin gida.
IGP ya ce. ’yan sandan za su ci gaba da binciki duk wasu dabarun da ake da su wajen tabbatar da tsaro da tsaron Nijeriya kamar yadda ’yan sandan suka tanada.
Shugaban ƙungiyar gwamnonin kuma gwamnan jihar Ekiti, Kayode Fayemi a jawabinsa ya yi kira da a samar da jami’an ’yan sanda da dama domin tabbatar da inganci wajen tabbatar da tsaro da rayuka da dukiyoyi.
Har ila yau, gwamnan jihar Akwa Ibom, Udom Emmanuel, ya buƙaci mahalarta taron da su samar da hanyoyin da za su bi wajen tunkarar ƙalubalen tsaro a ƙasar nan, musamman a daidai lokacin da al’ummar ƙasar ke shirin gudanar da babban zaɓe a shekara mai zuwa.
Gwamna Emmanuel ya kuma buƙaci mahalarta taron da su duba dalilan da suka sa matasa a ƙasar nan suke da hannu wajen aikata laifuka fiye da da, domin a tabbatar da an shawo kan matsalar da kuma ceto shugabannin Nijeriya a nan gaba.