Daga ABUBAKAR LABARAN a Kafanchan
Mai Martaba Sarkin Jema’a Alhaji Muhammadu Isa Muhammadu ya yaba wa sabon jami’in ɗan sanda na masarautar ASP Lami Friday.
Sarkin ya yi wannan yabon ne a fadarsa da ke ƙaramar hukumar Kafanchan Jema’a a jihar Kaduna a ƙarshen mako a wani gagarumin liyafar da ya shirya wa ma’aikaci mai barin gado da ya samu ƙarin girma daga muƙamin Sufeto zuwa Mataimakin Sufeto (ASP).
Alhaji Muhammadu ya bayyana cewa, jami’in ‘ɗan sandan ya gudanar da aikinsa yadda ya kamata a yayin da yake hidima a fadar, kuma ya buƙace shi da ya ci gaba da gudanar da aikinsa a duk inda aka kai shi.
A yayin da yake taya ta murnar ƙarin girma daga Insifeto zuwa ASP, Sarkin ya buƙaci jami’ar mai barin gadon da ta yi amfani da sabon matsayinta wajen ci gaba da gudanar da ayyukanta, ya kuma yi addu’ar Allah ya yi mata jagora, ya kare ta, ya kuma ba ta nasara a ayyukanta na gaba.
Daga nan sai Sarkin ya yabawa rundunar ‘yan sandan Nijeriya bisa ƙarin girma ga ASP Lami Friday zuwa sabon muƙaminta wanda a cewar sa ya dace. Ya kuma miƙa godiyarsa ga DPO reshen Kafanchan bisa ƙoƙarinsa na ganin an zauna lafiya tare da tabbatar da tsaro a dukkan al’ummar yankin.
Shi ma da yake jawabi a wajen taron, jami’in ‘yan sanda na Dibision (DPO) Kafanchan Kafanchan, CSP Hassan Yohanna, ya gode wa Sarkin bisa yadda ya karrama ɗaya daga cikin jami’ansa.
CSP Yohanna ya bayyana cewa rundunar da Masarautar sun ci gaba da samun kyakkyawar alakar aiki da aka tsara domin tabbatar da zaman lafiya da ɗorewar zaman lafiya a Masarautar da kewaye.
DPO Yohanna, ya bayyana ASP Lami Friday a matsayin ‘yar sanda ta gari, sannan kuma yana daya daga cikin ƙwararun jami’an da yake alfahari da su, inda ya buƙace ta da ta ci gaba da gudanar da sana’ar da aka santa da ita, tare da shirye-shiryen kai sashen ga ɗaukaka.
Daga nan sai ya shawarci dukkan jami’an da suka halarci taron da su jajirce wajen gudanar da ayyukansu domin ƙara azama gwamnatin tarayya na samar da tsaro ga ɗaukacin ‘yan ƙasar.
DPO ya ƙara da cewa gwamnatin tarayya ƙarƙashin jagorancin Shugaban ƙasa Bola Ahmed Tinubu ta sabunta bege ajenda ta sanya sha’awa sosai a harkokin tsaro na rayuka da dukiyoyin jama’a inda ya yi kira ga ‘yan sandan ƙasar nan da su yi aiki tuƙuru domin tabbatar da zaman lafiya da kwanciyar hankali.
Da take zantawa da Blueprint bayan liyafar, ASP Lami Friday ta nuna godiya ga Allah da wannan ƙarin girma da aka yi mata, sannan ta kuma gode wa Sarkin Jama’a bisa wannan karramawar da aka yi mata baya ga kyautar da aka yi mata wanda ta ce za ta ci gaba da kiyayewa a duk tsawon lokacin rayuwarta.
Jami’ar mai barin gado ta ce ta ji daɗin yin aiki a fadar masarautar a tsawon zamanta, saboda yadda Sarkin da kowa ya ba ta da ma’aikatanta goyon baya da hadin kan da take buƙata, kuma ta yi fatan za ta ci gaba da aiki a can a sabon muƙaminta amma kamar yadda wajibi ne, dole ne ta koma wani aiki.
Ta kuma nuna jin daɗin ta ga DPO nata kan yadda yake ci gaba da tallafa mata a duk lokacin da buƙatar hakan ta taso, ta kuma yi alkawarin yin amfani da sabon matsayinta wajen gudanar da ayyukanta ba tare da tsoro ko nuna son kai ba bisaƙa’idar aikinta.
