Daga MAHDI MUSA MUHAMMAD
Karamin Ministan Tsaro, Dokta Bello Muhammed Matawalle, ya yi kiyasin cewa Shugaban ƙasa Bola Ahmed Tinubu ya taka rawar gani a Arewa da sauran sassan Nijeriya.
Hakan ya biyo bayan sauya sheƙar wasu manyan mutane da suka haɗa da mai fafutukar kare haƙƙin bil adama kuma tsohon ɗan majalisar dattawa, Sanata Shehu Sani, tsohon gwamnan jihar Kaduna, Mukhtar Ramalan Yero, da kuma ɗan takarar gwamna na jam’iyyar NNPP a zaɓen 2023, zuwa jam’iyyar APC mai mulki.
Haka kuma a cikin su akwai tsoffin ‘yan majalisar dokokin ƙasar, Hon. Sani Sha’aban, Sanata Danjuma Laah, tsohon sakataren jam’iyyar PDP na kasa, Abubakar Mustapha, da tsohon wakilin Nijeriya a Koriya ta Kudu, Ambasada Sule Buba.
Ana cikin haka ne dai wasu manyan masu ruwa da tsaki a yankin arewacin ƙasar nan suka bayyana goyon bayansu ga takarar shugaban ƙasa Bola Ahmed Tinubu wanda har yanzu ba a bayyana shi ba.
Kuma daga jam’iyyar adawa ta PDP, ya fito kalaman kira ga mambobin jam’iyyar da su jajirce su gyara matsalolin da ke cikin jam’iyyar, inda suka ce babu wata jam’iyya ciki har da APC da ba ta da nata matsalar.
Da yake karɓar waɗanda suka sauya sheƙa zuwa jam’iyyar APC a wani gagarumin gangami da aka gudanar a ƙarshen mako a dandalin Murtala da ke Kaduna, Gwamna Uba Sani ya ba su tabbacin samun daidaito da walwala a cikin jam’iyyar.
“Wani wanda ya koma APC a yau da kuma wanda ya kasance memba na gidauniya shekaru 10 da suka wuce, matsayinsu ɗaya. Za su ci moriyar haƙƙoki da gata iri ɗaya,” inji shi.
Gwamnan ya buƙaci wadanda suka sauya sheka da su sanar da magoya bayansu cewa jam’iyyar APC ta ci gaba da kasancewa a bude ga ‘ya’yan jam’iyyar, yana mai alakanta farin jinin jam’iyyar ga shugabancinta a matakin jihohi da tarayya.
Gwamna Sani ya ci gaba da cewa: “Jam’iyyar APC ta zo ta zauna a Kaduna da Arewa da kuma Nijeriya baki ɗaya. A zaɓen 2027, daga sama har ƙasa, masu zaɓe za su zaɓi APC. A sama, za a zabi jagoranmu, Bola Tinubu. A matakin jiha kuma za a kada kuri’ar jam’iyyar a zaɓukan gwamnoni, na ƙasa da na ‘yan majalisar jiha.”
Yayin da yake tabbatar da cewa gwamnatinsa za ta ci gaba da gudanar da ayyuka a faɗin jihar, ba tare da la’akari da ɓangaranci na jam’iyya ko ƙabilanci ba, Sani ya ce: “Siyasa ta bambanta da mulki. Za mu yi wa kowa adalci, ko sun zaɓe mu ko ba su zaɓe mu ba, domin wannan ita ce rantsuwar muƙamai da muka yi.”
Gwamnan, wanda ya yarda cewa shugabanni ba ma’asumai ba ne, ya buƙaci ‘yan ƙasa da su bayyana kurakuran su yadda ya kamata, ya kuma tunatar da ’yan jam’iyyar cewa za a ɗora wa shugabanni alhakin kula da su.
A halin da ake ciki, Matawalle, ya ce saɓanin ra’ayin tsohon gwamna Nasir El-Rufai da korarren sakataren gwamnatin tarayya (SGF), Dr. Babachir Lawal, yankin arewacin ƙasar nan za su goyi bayan Tinubu a zaɓen 2027.
Sai dai da yake nuna rashin amincewarsa da ikirarin da suka yi a wata sanarwa, Matawalle ya ce: “Shugaban ƙasa Bola Ahmed Tinubu, wanda ya shafe watanni 19 a kan karagar mulki, ya bayar da gudunmawa sosai a dukkan yankunan Nijeriya, ciki har da Arewa. Al’ummar Arewa za su mara wa shugaban ƙasa baya don ganin an samu nasarori da gyare-gyaren da ya ƙaddamar.”
Da yake bayani a kan sauye-sauyen tsaro na gwamnatin Tinubu, Ministan ya ce “a cikin 2024 kaɗai: An kashe sama da ‘yan ta’adda 8,000 da ‘yan fashi. An kama masu laifi 11,600. An ƙwato makamai sama da 10,000. An ceto kusan mutane 8,000 da aka yi garkuwa da su.”
Ya kuma yi nuni da kafa Cibiyar Yaƙi da Garkiwa da Mutane ta ‘Multi-Agency Anti-Kidnap Fusion Cell’ (MAAKFC) watan Disamba 2024, wani ƙoƙarin haɗin gwiwa tare da Hukumar Kula da Laifukan ƙasa ta Burtaniya, wanda a cewarsa, ya inganta haɗin gwiwa wajen yaƙi da garkuwa da mutane.
“Arewa ta tsaya tsayin daka wajen mara wa Shugaba Tinubu baya. Duk wani ɓatanci da akasin haka, wani yunƙuri ne da gangan na haifar da fitina da kuma kawo cikas ga tsaron ƙasa,” inji Matawalle.
Tsohon gwamnan na jihar Zamfara ya kuma yi nuni da manufofin tattalin arziki da gwamnatin Tinubu ke jagoranta, waɗanda a cewarsa, na da nufin inganta rayuwar Arewa.
Ya lissafa waɗannan da suka haɗa da; “ƙirƙirar Ma’aikatar Kula da Kiwon Dabbobin, wadda ke inganta ci gaban tattalin arziki, da baiwa al’ummar karkara ƙarfin gwiwa, da samar da wadataccen abinci. Rugujewar farashin hatsi a duk faɗin ƙasar, yana nuna nasarar manufofin gwamnati na noma.
“Ayyukan samar da ababen more rayuwa da suka haɗa da gina tituna da inganta hanyoyin sufuri, waɗanda ke farfaɗo da tattalin arzikin Arewa.”
Ya ce: “Yana da muhimmanci a gare mu a Arewa mu tantance fa’idojin da shugaban ƙasa ya yi na gyara. Kukan rashin amincewa bai kamata ya mamaye ci gaban da ake samu ba.”
“Ba za mu iya ɓoye goyon bayanmu ga Shugaba Tinubu ba. Mun tsaya tsayin daka kan manufarsa ta samar da wadata da kwanciyar hankali a Nujeriya,” inji Matawalle.
