Daga ABUBAKAR MUHAMMAD TAHEER
Gwamnan Jihar Jigawa Alhaji Umar Namadi Ɗan Modi, ya gabatar da kasafin shekarar 2024 ga ‘yan majalisar dokokin jihar a ranar Talata.
Namadi ya bayyana cewa kasafin na 2024, za a kashe Naira biliyan 111.98 wajen gudanar da ayyukan yau da kullum.
Haka kuma, ya ce an ware kashi 59% cikin 100% wanda adadin sa ya kai Naira biliyan 175.42 domin gudanar da manyan ayyuka a faɗin jihar.
Ya ƙara da cewa an yi nazari da taka-tsan-tsan wajen tsara kasafin duba da yadda Dalar Amurka take tashin gwauron zabbi da kuma farashin ɗanyen mai a kasuwannin duniya.
Kaxalika, ya ce kaso 27.4 na kasafin za a kashe su wajen inganta rayuwar al’ummar jihar, sannan kuma akwai ayyuka gina gidaje a manyan garuruwan Hadejia, Birnin Kudu, Gumel, Kazaure, Rungume, Kafin Hausa da Babura wanda zai laƙume Naira biliyan 2.78.
Namadi ya ce inganta kiwon lafiya zai laƙume biliyan 20.3 wanda za a ɗaukaka darajar asibitoci 13 a wasu garuruwan jihar tare da maida biyu daga cikinsu manyan asibitoci.
Kasafin ya nuna ɓangarorin ilimi da noma da ruwan sha a ƙauyuka sun samu kaso mai tsoka inda Gwamna ya bayyana cewa za a ɗauki malaman makaranta 30,000 aiki a fadin jihar domin inganta sha’anin ilimi.
Kasafin na bana an masa take da “Kasafin kai jihar Jigawa tudun mun tsira”, ya ɗara ta bara saboda saboda ƙarin kuɗaɗen albashin ma’aikata.
