Daga SANI AHMAD GIWA a Abuja
Sanata mai wakiltar Sakkwato ta Arewa Sanata Aliyu Wamakko, ya nisanta kansa daga rahotannin da ke alaƙanta shi da wani raɗe-raɗin da ake yaɗawa na cewa yana son zama mataimakin shugaban ƙasa a 2027.
A wata sanarwar manema labarai da ya rabawa manema labarai a safiyar Litinin, tsohon gwamnan jihar Sakkwato kuma Sarkin Yamman Sakkwato, ya bayyana iƙirarin a matsayin ƙarya, da kuma ɓata masa siyasa.
Hakan na zuwa ne a matsayin martani ga wata sanarwa da aka danganta ga shugaban ƙaramar hukumar Kebbe, Abdullahi Yerima, wanda wata jarida ta buga.
A cikin wata sanarwa da mai magana da yawunsa Abdallah el-Kurebe ya sanya wa hannu, Wamakko ya musanta cewa ya taɓa nuna sha’awarsa, ko dai a bainar jama’a ko a sirrance, na tsayawa takarar mataimakin shugaban ƙasa ko kuma irin wannan muƙamin na siyasa gabanin babban zaɓen 2027.
An samu rikici a jam’iyyar All Progressiɓes Congress kan tikitin mataimakin shugaban ƙasa Kashim Shettima a lissafin 2027.
Kwanan nan, taron masu ruwa da tsaki na jam’iyyar Arewa maso Gabas ya zama ruɗani bayan shugabannin sun amince da Shugaba Bola Tinubu a 2027 ba tare da ambaton Shettima ba.
Tun daga wannan lokacin ne ake ta raɗe-raɗin cewa yankin Arewa maso Yamma na shirin gabatar da wanda zai maye gurbin Shettima a matsayin mataimakin shugaban ƙasa a shekarar 2027.
Fadar shugaban ƙasar ta kuma yi watsi da rikicin da ake yayatawa tsakanin Tinubu da Shettima tare da dagewa cewa shugaban ƙasa zai zaɓi abokin takararsa bayan ya amince da takarar jam’iyyar a babban taron da jam’iyyar ta shirya.
Da yake nisanta kansa da duk wani yunƙuri na siyasa na maye gurbin Shettima, Wamakko ya ce bai taɓa nuna sha’awar wannan muƙamin ba.
“Muna so mu bayyana babu shakka cewa Sanata Wamakko bai taba nuna sha’awar tsayawa takarar mataimakin shugaban ƙasa a zaɓen 2027 a wani lokaci ba, a fili ko a ɓoye.
Sanarwar ta ƙara da cewa “Duk wani ɓatanci ko da’awar hakan karya ce, mara tushe, kuma maras makama.”
Tsohon gwamnan ya ƙara da bayyana kalaman Yerima a matsayin wani sakaci da ganganci da nufin yaudarar jama’a da jawo sunansa cikin ‘yan siyasa mara buƙata kuma marasa tushe.
Sanarwar ta yi kira ga shugaban ƙaramar hukumar Kebbe da ya gaggauta janye maganar tare da bayar da haƙuri ga jama’a ga Sanatan da iyalansa.
“Bari a rubuta cewa Sanata Aliyu Magatakarda Wamakko ya ci gaba da mayar da hankali wajen yi wa al’ummar jihar Sakkwato da ƙasa hidima ta hanyar jagoranci da kuma dattaku a siyasance, kuma bai kamata a sanya shi cikin labarun damammaki da aka tsara don son kai ba,” inji sanarwar.
Ofishin Sanatan ya kuma soki kafafen yaɗa labarai da buga rahoton ba tare da tantance sahihancin sa ba.
