Daga USMAN KAROFI
Yaƙin Gaza na ci gaba da tsananta, inda kimanin mutane 43,391 suka rasa rayukansu, yawancin su mata da yara. Baya ga haka, mutane 102,337 sun jikkata a Gaza cikin kwanaki 398 na tashin hankali, wanda Ambasada Abdullah M. Abu Shawesh ya bayyana a matsayin hari marar imani da ta’addanci. A cikin shekarar da ta gabata kaɗai, an kashe ɗalibai 11,923 tare da jikkata wasu 19,199. Har ila yau, an kai hari kan gine-ginen makarantu da jami’o’i guda 341, yayin da 77 daga cikinsu aka rusa su gaba ɗaya.
Ambasadan ya ƙara da cewa Isra’ila ta saki kimanin tan 85,000 na bama-bamai a kan Gaza, wanda ya zarce adadin wanda aka yi amfani da shi a yaƙin duniya na biyu, ciki har da bama-baman da doka ta hana irin su fosphorus. Kasafin kuɗin da ƙasar Amurka ta kashe wajen tallafa wa Isra’ila a wannan yaƙin ya kai dala biliyan 22.76 cikin shekara guda. Wannan matakin na haifar da bala’i a Gaza, inda kashi 90% na jama’a suka rasa muhallansu, suna rayuwa a sansanonin gudun hijira babu abin da zai taimaka wajen samun abinci da magunguna.
Cibiyar bincike ta Watson Institute for International and Public Affairs ta bayyana cewa kaso 96% na al’ummar Gaza suna fuskantar matsanancin rashin abinci, yayin da mutum miliyan 2.15 ke fama da yunwa mai tsanani. Akwai ruwan sha lita 4.74 kacal a kowanne mutum a kullum, wanda bai kai rabin adadin da ake buƙata ba. Bugu da ƙari, a asibitocin Gaza guda 36, guda 4 ne kawai suka rage ba tare da sun samu lahani ko harin soja ba, yayin da ma’aikatan lafiya 880 suka mutu sakamakon hare-haren.
Ambasada Abu Shawesh ya yi kiran gaggawa ga duniya, yana roƙon manyan ƙasashe su kawo ƙarshen wulaƙancin da ake yi wa Gaza da kuma ’yan jaridar jin ƙai da suke taimaka wa marasa galihu. Shugabannin hukumomi guda 15 na Majalisar Ɗinkin Duniya sun yi kira ga Isra’ila da ta dakatar da hare-haren da ake kai wa makarantu da sansanonin da ke ɗauke da ‘yan gudun hijira. Har ila yau, jami’ai 197 na UNRWA da wasu makarantu da aka yi amfani da su wajen samar da mafaka sun mutu yayin harin. MDD ta nuna damuwa da cewa rayuwar al’ummar Gaza tana cikin haɗari sosai sakamakon yunwa, rashin lafiya, da kuma ta’addanci.
