Wani jirgin fasinja mai ɗauke da mutane 67 daga Azerbaijan zuwa kudancin Rasha ya faɗi a kusa da birnin Aktau na Kazakhstan a ranar Laraba, 25 ga Disamba. Rahotanni daga CNN sun bayyana cewa ma’aikatar harkokin gaggawa ta Kazakhstan ta tabbatar da faruwar hatsarin, inda ta ce tawagoginta sun tarar da jirgin yana ci da wuta a wurin da ya faɗi.
Ma’aikatar ta ce, “Masu bada agaji na gaggawa sun fara kashe wutar. A halin yanzu, ana tantance bayanai game da waɗanda abin ya shafa, kuma a cewar bayanai na farko, akwai waɗanda suka tsira.” Jirgin yana ɗauke da fasinjoji 62 da ma’aikatan jirgi guda biyar yayin da hatsarin ya faru.
Kamfanin jirgin Azerbaijan Airlines ya bayyana cewa jirgin mai lamba J2-8243, wanda ke amfani da jirgin Embraer 190, ya taso ne daga babban birnin Azerbaijan, Baku, zuwa Grozny a yankin Chechnya na Rasha. Rahotanni sun nuna cewa jirgin ya yi saukar gaggawa kimanin kilomita 3 daga birnin Aktau.
Hukumar ta ƙara da cewa ana cigaba da gudanar da bincike kan musabbabin hatsarin, tare da tabbatar da taimakon gaggawa ga waɗanda suka tsira. Wannan lamari ya janyo hankalin hukumomi domin ɗaukar matakan tabbatar da tsaro ga fasinjoji a nan gaba.
