Daga BELLO A. BABAJI
Hukumar tace ɗanyen man fetur ta Ƙasa, NMDPRA, ta haramta wa tireloli masu tankin da ke ɗaukar lita 60,000 na fetur hawa manyan titina a Nijeriya, wanda hakan zai fara aiki ne daga ranar 1 ga watan Maris.
Shugaban Hukumar, Ahmad Farouk ya bayyana hakan ga manema labarai jim-kaɗan bayan kammala zaman kwamitin masu-ruwa-da-tsaki a ranar Laraba a Abuja.
Ya kuma ce, zuwa ƙarshen ɗaya bisa huɗu na shekarar 2025 babu tanka mai girman lita 45,000 da za a sake loda wa fetur.
Zaman ya ƙunshi manyan jami’ai daga hukumomin SSS, FRSC, NARTO, NUPENG, SON, DAPPMAN da kuma NMDPRA.
Ahmad Farouk, wanda Babban Daraktan tsare-tsaren rabawa da taskacewa na NMDPRA, Ogbugo Ukoha ya wakilce shi, ya ce sun ɗauki matakin ne la’akari da yawaitar hatsari tankokin fetur da ake samu akai-akai a Nijeriya.
Ya kuma yi watsi da batin da ke cewa akwai fetur mara inganci da ake raba wa gidajen mai, inda ya bayyana hakan a matsayin ƙoƙarin ruɗar da al’umma, ya na mai cewa duk fetur ɗin ake fitar wa, sai an tabbatar da ya cika ƙa’idodin tacewa kafin a yi jigilar sa ga al’umma.
