Daga SANUSI MUHAMMAD a Gusau
Dakarun sashe na biyu tare da haɗin gwiwar Air Component na rundunar haɗin gwiwa ta Operation Fansan Yamma sun ceto mutane 101 da aka yi garkuwa da su a Ƙanƙara a Jihar Katsina da Shinkafi a Jihar Zamfara a ranakun 17 da 18 ga watan Maris 2025.
Laftanar Kanar Abubakar Abdullahi ya bayyana hakan a wata sanarwa da ya fitar yau Laraba. A cewarsa, a yayin wannan farmakin, an kashe ‘yan ta’adda 10 a wani arangama da suka yi a gundumar Faru da ke ƙaramar hukumar Maradun.
Rundunar ta fara kai farmakin ne a Jihar Katsina, inda sojojin suka kai farmakin da gangan a kan ’yan ta’addan a babbar filin Pauwa da ke ƙaramar hukumar Ƙanƙara. Hakan ya haifar da kashe ‘yan ta’adda uku tare da kuɓutar da mutane 84 da aka yi garkuwa da su.
Daga bisani an miƙa waɗanda abin ya shafa ga hukumomin ƙananan hukumomin domin ɗaukar mataki.
A halin da ake ciki kuma, a Zamfara, sojojin sun ɗauki matakin ne kan bayanan da suka shafi ayyukan ta’addanci a yankin Bagabuzu da ke gundumar Faru a ƙaramar hukumar Maradun. Hakan ya kai ga kashe ‘yan ta’adda bakwai tare da ƙwato wani babur da dai sauransu.
Bugu da ƙari, an yi nasarar kuɓutar da mutane 17 da wani ɗan ta’adda ya yi garkuwa da su daga ƙauyukan Tsibiri da Doka da ke ƙaramar hukumar Shinkafi, inda a yanzu haka suke samun kulawar likitoci a wani asibiti da ke yankin.
Rundunar ‘Operation Fansan Yamma’ na ci gaba da jajircewa wajen tabbatar da tsaro da tsaron al’ummar a jihohin Katsina da Zamfara.
Harin na ci gaba da jan hankalin jama’a da su kasance cikin taka tsan-tsan tare da bayar da goyon baya ga ƙoƙarin da suke yi, yana mai jaddada cewa haɗin kan al’umma na da matuƙar muhimmanci wajen ci gaba da samun nasarar yaƙi da ta’addanci a yankin.
