Ya rasu ne a ranar Alhamis a wani asibiti mai zaman kansa da ke Abuja sakamakon gajeriyar rashin lafiya.
Sakataren masarautar Gusau, Sambo A. Sambo ne ya sanar da hakan, wanda ya tabbatar da rasuwar sarkin a madadin majalisar.
An naɗa Ibrahim Bello, Sarkin Daraja na ɗaya a ranar 16 ga Maris, 2015, a zamanin gwamnatin tsohon gwamnan Jihar Zamfara, Sanata Abdulaziz Yari Abubakar.
Shi ne Sarkin Gusau na 15, wanda ya fito daga zuriyar Sheik Sambo Ɗan Ashafa, makusancin babban jigo a Musulunci kuma jagoran jihadi, Usman Ɗan Fodio, kuma wanda ya kafa Sarkin Gusau.
Kafin ya hau karagar mulki, Dakta Bello ya kasance ƙwararre mai lasisin aikin jinya, wanda ya shahara wajen bayar da gudunmawa wajen bunƙasa harkar lafiya a jihohin Sakkwato da Zamfara.
Marigayi Sarkin ya rasu ya bar matansa da ‘ya’yansa da jikokinsa.
Ana sa ran Majalisar Masarautar Gusau za ta bayyana shirye-shiryen jana’izar sa nan ba da jimawa ba.
