Daga MAHDI MUSA MUHAMMAD
Hukumar Kula da Tsarin Rarraba Hasken Wutar Lantarki mai zaman kanta a Nijeriya (NISO), ta yi gargaɗi cewa ƙasar na rasa kusan Naira tiriliyan 40 a duk shekara sakamakon yawaitar katsewar wutar lantarki.
Hukumar ta bayyana cewa wannan matsala na daga cikin manyan abubuwan da ke hana ci gaban tattalin arziki, rage yawan ayyukan masana’antu da kuma hana samar da ayyukan yi a ƙasar.
Rahotanni sun nuna cewa wannan asara, wacce ta kai kusan dala biliyan 29 a shekara, na jefa ’yan kasuwa, masana’antu da gidaje cikin mawuyacin hali, domin suna kashe kuɗaɗe masu yawa wajen samar da wutar lantarki da kansu ta hanyar janareto.
A cewar NISO, rashin ingantaccen tsarin samar da wuta ne ya tilasta wa miliyoyin ’yan Nijeriya dogaro da janareto, lamarin da ke ƙara tsadar rayuwa da kuma rage ribar kasuwanci.
Hukumar ta jaddada cewa ingantacciyar wutar lantarki na daga cikin ginshiƙan ci gaban tattalin arziki, amma katsewar wuta na janyo asarar biliyoyin daloli a kowace shekara.
Duk da cewa Nijeriya na samar da wutar lantarki tsakanin megawatt 45,000 zuwa 50,000 a kullum, sai dai kusan megawatt 5,000 ne kawai, wato kashi 10 cikin 100, ke isa ga al’umma ta hanyar babban layin ƙasa, wato national grid.
Wannan babban giɓi, a cewar hukumar, na faruwa ne sakamakon matsaloli da dama da suka hada da ƙarancin ƙarfin layin watsa wuta, gazawar hanyoyin rarrabawa da kuma matsalolin samar da iskar gas.
Hukumar ta bayyana cewa waɗannan matsaloli na tsarin wutar lantarki sun taƙaita yadda ake isar da wutar ga masu amfani, lamarin da ke sa yawancin wutar da ake samarwa ba ta amfani yadda ya kamata.
Domin magance wannan matsala, NISO ta bayar da shawarar aiwatar da gyare-gyare masu muhimmanci, ciki har da tabbatar da bin dokokin tsarin lantarki, inganta yadda ake rarraba wuta, da kuma ƙara gaskiya da rikon amana a fannin.
Haka kuma, ta ba da shawarar yin amfani da fasahar zamani wajen sarrafa tsarin lantarki, faɗaɗa kayayyakin more rayuwa da kuma karkata zuwa hanyoyin samar da makamashi daban-daban.
Duk da ƙalubalen da ake fuskanta, hukumar ta ce an samu wasu nasarori a ’yan shekarun nan. Ta bayyana cewa an girka sabbin na’urorin canja wuta 82 tsakanin 2024 da 2025, wanda ya ƙara ƙarfin tsarin da megawatt 8,500, tare da kammala sama da ayyukan watsa wuta 30 a faɗin ƙasar.
Har ila yau, an samu cigaba wajen amfani da fasahar zamani ta SCADA/EMS, wanda aka zuba jarin dala biliyan 1.16 a cikinsa. Wannan tsarin ya haɗa da shimfiɗa layin fiber optic sama da kilomita 3,000 da kuma samar da sabbin na’urorin lura a sama da tashoshin wuta 100, domin inganta sa ido da yanke shawara cikin gaggawa.
Sai dai duk da waɗannan ci gaba, rahotanni daga Kamfanin Rarraba Wutar Lantarki na Nijeriya sun nuna cewa wutar da ake rabawa kamfanonin rarraba wuta 11 a ƙasar ta ragu matuƙa, inda a ranar 25 ga Maris, 2026 aka rarraba megawatt 2,908 kawai—abin da ya yi ƙasa da buƙatar ƙasa.
Ministan wutar lantarki, Adebayo Adelabu, ya bayyana cewa kusan kashi 75 cikin 100 na tashoshin wutar lantarki masu amfani da gas na fuskantar matsalolin samar da iskar gas, wanda ke hana su aiki yadda ya kamata.
A ƙarshe, NISO ta jaddada cewa idan ba a ɗauki matakan gaggawa ba, matsalar wutar lantarki za ta ci gaba da jawo asarar dukiya mai yawa tare da hana ci gaban ƙasa. Hukumar ta yi kira ga gwamnati da masu ruwa da tsaki da su haɗa kai wajen gyara tsarin lantarki domin ceto tattalin arzikin Nijeriya.
