Gwamnatin Italiya ta zaɓi yin shiru domin kare dangantaka da Amurka, yayin da ake sa ran shugabannin biyu za su haɗu a taron NATO.
Sabuwar takun-saƙa ta ɓarke tsakanin Shugaban Amurka, Donald Trump, da Firaministar Italiya, Giorgia Meloni, bayan shugaban na Amurka ya zargi Meloni da ƙin ba Washington goyon baya a rikicin da ake yi da Iran.
Duk da cewa Trump ya bayyana Meloni a matsayin “mutumiyar kirki”, ya ce rashin amincewarta ta shiga cikin ƙoƙarin da Amurka ke yi game da Iran ya janyo tsaiko a kyakkyawar dangantakar da ke tsakaninsu.
Trump ya yi waɗannan kalamai ne yayin da yake halartar taron ƙungiyar NATO a birnin Ankara na ƙasar Turkiyya, inda ya ce alaƙarsa da Firaministar Italiya ta fara yin rauni ne bayan ta ƙi mara wa Amurka baya kan batun Iran.
Ya ce: “Ta ƙi shiga cikin lamarin, kuma hakan ya sa dangantakarmu ta ɗan lalace. Amma ina sonta. Ina ganin mutumiyar kirki ce. Sai dai ina ganin ta yi kuskure.”
A wani lokaci da ya gabata, Meloni na daga cikin shugabannin Turai da ake ganin suna da kusanci da Trump, musamman saboda ra’ayoyinsu na siyasa masu karkata zuwa ɓangaren masu ra’ayin mazan jiya.
Sai dai dangantakar ta fara lalacewa a watan da ya gabata bayan Trump ya yi ikirarin a wata hira da tashar talabijin ta Italiya cewa Meloni ta roƙe shi su ɗauki hoto tare yayin taron ƙasashen G7 da aka gudanar a Faransa.
Firaministar ta musanta wannan zargi gaba ɗaya, tana mai cewa Trump ya ƙirƙiri labarin ne ba tare da hujja ba.
Tun da farko ma, Meloni ta soki Trump bayan yadda ya mayar da martani ga kalaman Paparoma Leo, wanda ya yi Allah wadai da yaƙin Iran. Wannan suka da ta yi ya ƙara fusata shugaban na Amurka.
Daga baya Trump ya zarge ta da ƙin taimakawa wajen sake buɗe mashigin Hormuz, wata muhimmiyar hanyar jigilar man fetur da ta zama cibiyar rikicin yankin.
Rahotanni sun kuma tuna cewa a watan Maris gwamnatin Italiya ta hana wasu jiragen sojin Amurka sauka a sansanin Sigonella da ke tsibirin Sicily kafin su nufi Gabas ta Tsakiya, saboda Washington ba ta nemi izini daga gwamnatin Rome ba kafin shirya wannan tafiya.
Sabuwar takaddamar ta sake ƙara ƙamari ne bayan Trump ya wallafa wani hoto na Meloni a shafinsa na Truth Social, inda ya rubuta kalmomin da ke nuna cewa tana buƙatar a hana ta kusantarsa. Wannan mataki ya sake tayar da cece-kuce gabanin haɗuwarsu a taron NATO.
Duk da waɗannan kalamai masu zafi, gwamnatin Italiya ta bayyana cewa ba za ta mayar da martani ba, tana mai cewa tana son kauce wa duk wani abu da zai iya ƙara dagula dangantakar ƙasashen biyu.
Ministan harkokin wajen Italiya, Antonio Tajani, ya shaida wa jaridar La Stampa cewa Trump mutum ne da ke son jawo cece-kuce, musamman ta kafafen sada zumunta, saboda haka gwamnati ta yanke shawarar daina ba da muhimmanci ga irin waɗannan kalamai.
A nasa ɓangaren, ofishin Firaminista Giorgia Meloni ya ƙi yin tsokaci kan yadda za ta yi mu’amala da Trump idan suka haɗu a Ankara.
Sai dai wata majiya da ke kusa da Meloni ta bayyana cewa ba za ta nuna fushi ko kauce wa shugaban Amurka ba. A cewar majiyar, Firaministar ta saba da irin waɗannan yanayi kuma ana sa ran za ta tarbe shi cikin murmushi, duk da saɓanin da ya kunno kai tsakanin shugabannin biyu.
