Daga SANI AHMAD GIWA a Abuja
Wata kotu a Kenya ta bayar da umarnin dakatar da wasu ayyukan da suka shafi gina sabuwar matatar man Dangote da aka shirya ginawa a Lamu, Arewa maso Gabashin ƙasar, mai darajar kusan dala biliyan 16, bayan da wasu mazauna yankin 133 suka shigar da ƙara suna ƙalubalantar yadda aka samu filayen da ake shirin gudanar da aikin.
Matakin kotun ya zo ne kwanaki biyu kacal kafin bikin aza harsashin fara aikin matatar da aka shirya gudanarwa a ranar Laraba, 30 ga Satumba, 2026.
Masu ƙarar, waɗanda suka bayyana kansu a matsayin manoma da mazauna yankin Lamu, sun ce aikin matatar zai tauye musu haƙƙin mallakar filayensu. Sun kuma yi zargin cewa shirin ya haɗa da tilasta korarsu daga filayensu, lalata gidaje da wasu kadarorinsu, ba tare da samar musu da isasshen tsarin biyan diyya ko matsugunin maye gurbinsu ba.
Mai Shari’a Jane Onyango ta bayar da umarnin a ci gaba da barin komai yadda yake a halin yanzu a filin da ake takaddama a kai da ke yankin Lamu, har zuwa ranar 14 ga Oktoba, lokacin da kotun za ta ci gaba da sauraron batun.
Lauyan masu ƙarar, George Wakahiu, ya ce umarnin kotun na nufin ba za a iya ci gaba da wasu ayyukan gini a filin da ake takaddama a kai ba har sai kotun ta sake zama a ranar 14 ga Oktoba. Umarnin ya shafi ayyuka kamar share fili, tono ƙasa, sanya katanga, rusa gine-gine da kuma fara gine-gine a sassan filin da ake takaddama a kai.
Masu filayen sun kuma yi zargin cewa kamfanin ɗangote da hukumomin Kenya ba su bi wasu tanade-tanaden dokokin muhalli na ƙasar ba, musamman abin da ya shafi tantance tasirin muhalli kafin fara manyan ayyukan gine-gine.
Haka kuma, masu ƙarar sun ce ba a gudanar da cikakkiyar tuntuba da al’ummomin da abin ya shafa ba, kamar yadda kundin tsarin mulkin Kenya da wasu dokoki suka tanada. Waɗannan dai zarge-zarge ne da ke gaban kotu, kuma har yanzu ba a yanke hukunci a kansu ba.
A nasa martanin, Kamfanin Dangote ya ce umarnin kotun bai dakatar da bikin aza harsashin fara aikin matatar da aka shirya gudanarwa a ranar Laraba ba, sai dai ya amince cewa matakin kotun na iya shafar wasu ayyuka a filin. Kamfanin ya ce ɓangarorin da abin ya shafa ba za su gudanar da wasu ayyuka ba har sai an saurari batun a ranar 14 ga Oktoba.
Gwamnatin Kenya ma ta bayyana cewa bikin aza harsashin aikin zai ci gaba kamar yadda aka shirya, duk da umarnin kotun na ci gaba da barin yanayin filin yadda yake har zuwa lokacin sauraron ƙarar.
Sabuwar matatar man Dangote da ake shirin ginawa a Lamu na daga cikin manyan ayyukan masana’antu da ake shirin gudanarwa a Gabashin Afirka. An tsara matatar ta samar da damar tace kusan ganga 700,000 na ɗanyen mai a kowace rana, tare da taimakawa wajen rage dogaro da shigo da tataccen man fetur daga ƙasashen waje.
Aikin na kuma daga cikin manyan tsare-tsaren raya ababen more rayuwa da ke ƙarƙashin Lamu Port-South Sudan-Ethiopia Transport Corridor, wanda ya haɗa da layukan dogo, bututun mai, tashar samar da wutar lantarki, hanyoyi da filayen jiragen sama.
