Rundunar ’yan sandan jihar Jigawa ta cafke wata sabuwar amarya bisa zargin hallaka mijinta ta hanyar sanya masa maganin ɓera a abinci, lamarin da ya girgiza al’umma a ƙauyen Gauza da ke ƙaramar Hukumar Jahun ta jihar Jigawa.
Rahotanni sun nuna cewa al’amarin ya faru ne da misalin ƙarfe 5:00 na yamma ranar 23 ga Janairu, 2026. Marigayin, wanda ba a bayyana sunansa nan take ba, ya dawo gida inda ya ci abincin da aka tanadar masa, kafin daga bisani ya fara jin jiki yana tabarbarewa cikin gaggawa.
Mai magana da yawun rundunar ’yan sandan jihar, SP Shi’isu Adam, ya tabbatar da faruwar lamarin a wata sanarwa da aka fitar a Dutse, babban birnin jihar.
Ya ce an garzaya da mutumin asibiti domin ceto ransa, amma duk da ƙoƙarin likitoci, an tabbatar da rasuwarsa yayin da ake kula da shi.
Bayan mutuwar tasa cikin yanayi mai tayar da hankali, jami’an bincike daga ofishin ’yan sandan Jahun suka fara gudanar da bincike kan musabbabin faruwar lamarin. Daga nan ne aka kama matar mamacin a matsayin babbar wacce ake zargi.
A cewar rundunar, matar ta amsa cewa ita ce ta sanya maganin ɓera a abincin mijin nata. Har ila yau, ta bayyana cewa ta aika ɗan uwanta ya sayo mata gubar da aka yi amfani da ita. Ta kuma yi iƙirarin cewa an tilasta mata auren ne ba tare da son ranta ba, abin da ta ce shi ne ya jefa ta cikin damuwa har ta aikata wannan ɗanyen aiki.
Sai dai rundunar ’yan sandan ta jaddada cewa bincike bai kammala ba, domin gano cikakken bayani kan lamarin, ciki har da ko akwai wasu da suka taimaka mata ko kuma sahihancin iƙirarin da ta yi.
Kwamishinan ’yan sandan jihar ya bayar da umarnin a miƙa shari’ar zuwa sashen binciken manyan laifuka na jihar (SCID) domin zurfafa bincike. Rundunar ta ce da zarar an kammala bincike, za a gurfanar da wacce ake zargi a gaban kotu domin fuskantar hukunci daidai da doka.
’Yan sanda sun yi kira ga jama’a da su kasance masu bin doka da oda, tare da kauce wa ɗaukar doka a hannunsu wajen warware matsalolin iyali ko na aure.
Sun jaddada cewa irin waɗannan matakai kan haifar da nadama da asara marasa gyaruwa ga iyalai da al’umma baki ɗaya.
Rundunar ta kuma tabbatar wa mazauna jihar cewa za ta tabbatar an yi adalci a wannan lamari, tare da ci gaba da tsare wacce ake zargi har zuwa lokacin da za a kammala dukkan matakan doka.
