Wani faifan bidiyo da ya bazu a shafukan sada zumunta ya haddasa muhawara mai zafi, bayan an yi iƙirarin cewa wani mutum ɗan ƙasar Rasha ya yi tattaki zuwa Afirka da nufin yaɗa cutar ƙanjamau, wato HIɓ. Sai dai har yanzu babu wata hujja ta hukuma da ta tabbatar da wannan zargi.
Wata mai amfani da dandalin Instagram mai suna Jullie Cassie ce ta wallafa labarin a shafinta, inda ta yi zargin cewa mutumin, wanda ta ce yana ɗauke da cutar HIɓ, ya kwanta da mata masu yawa ba tare da kororon roba ba bayan isowarsa Afirka.
A cewar rubutunta, ta ce mutumin ya kamu da cutar ne daga wata mata a Rasha, sannan ya rantse zai yaɗa cutar ga mata da yawa. Ta kuma yi iƙirarin cewa yana ɗaukar bidiyon wasu daga cikin hulɗoɗinsa, lamarin da ta ce shi ne ya sa batun ya fara yawo a kafafen sada zumunta.
Jullie Cassie ta nuna matuƙar mamakinta kan lamarin, tana tambayar dalilin da ya sa wasu mata ke shiga hulɗa da baƙi ba tare da amfani da kororon roba ba. Ta bayyana cewa abin na da tayar da hankali, musamman idan aka yi la’akari da haɗarin lafiyar jama’a.
Bayan wallafar bidiyon, martani ya barke a soshiyal midiya, inda wasu mutane suka buƙaci a binciki gaskiyar zargin kafin a ɗauki mataki, yayin da wasu kuma suka nemi a kama mutumin idan har zarge-zargen sun tabbata. Wasu sun yi kira da a ƙara wayar da kan jama’a kan muhimmancin kare kai da kuma bin ƙa’idojin lafiya a hulɗar jima’i.
Lamarin ya kuma sake tayar da tattaunawa kan yadda bayanai marasa tabbaci ke saurin yaɗuwa a shafukan sada zumunta, musamman a dandamali irin su Instagram, da kuma yadda hakan kan haifar da fargaba da ruɗani a tsakanin al’umma.
Duk da zafin muhawarar da batun ya haddasa, har yanzu babu wata sanarwa daga hukumomin lafiya ko na tsaro da ta tabbatar da faruwar lamarin ko kuma kama wanda ake zargi. Masana na ci gaba da jaddada muhimmancin tantance gaskiya kafin yanke hukunci, tare da ƙarfafa bin hanyoyin kariya da kula da lafiya.
