Gwamnan Jihar Filato, Caleb Mutfwang, ya sanar da haramta kiwo da dabbobi da dare da kuma taƙaita amfani da babura a faɗin jihar, sakamakon hare-haren da ake ta fama da su a yankuna daban-daban. A cikin wani jawabi da ya gabatar a ranar Laraba, gwamnan ya bayyana hare-haren da ake kaiwa a matsayin “tsare-tsaren ta’addanci” da nufin korar jama’a daga muhallansu na asali.
Mutfwang ya ce daga yanzu, ba a yarda a kwashe shanu da mota bayan ƙarfe 7 na dare ba, sannan kuma amfani da babura daga karfe 7 na dare zuwa 6 na safe ya haramta har sai wani lokaci. Ya ce, “Jihar Filato ba za ta miƙa wuya ga tsoro ba, kuma ba za mu amince da wannan ɗabi’ar zubar da jini a matsayin sabon al’ada ba.”
Har ila yau, ya ce gwamnatinsa na ƙara azama wajen kare rayuka da dukiyoyin al’umma da tabbatar da doka a dukkan ƙananan hukumomin jihar. Ya kuma buƙaci al’umma da su bada haɗin kai wajen kare kansu cikin bin doka, yana mai cewa ba za a ci gaba da zubar da jini ba yayin da aka rasa aƙalla mutane 50 a harin baya-bayan nan da aka kai Kimakpa, ƙaramar hukumar Bassa .
