Daga BASHIR ISAH
Allah Ya yi wa jarumi a masana’antar shirya finafinai ta Nollywood, John Okafor da aka fi sani da Mr Ibu, rasuwa.
Tashar Channels Television ce ta bayyana mutuwar jarumin a ranar Asabar.
Majiya ta kusa da marigayin ta shaida wa Channels Television cewa, a ranar Asabar da rana jarumin ya riga mu gidan gaskiya a wani asibitin Lekki da ke Legas.
Marigayin mai shekara 62, an garzaya da shi asibiti ne kusan mako guda da ya gabata sakamakon rashin lafiya.
A shekarar da ta gabata aka yi wa jarumin aiki inda aka cire masa ƙafa guda sakamakon lalurar rashin lafiyar da yake fama da ita.