Daga AISHA ASAS
Samar da Kano Film Village na ƙara jan hankalin masana’antar fina-finan Hausa, bayan wani sabon rahoto da ya sake bayyana irin ci gaban da cibiyar ke samu a Kano. Wurin da aka samar domin sauƙaƙa wa masu shirya finafinai wajen samun wuraren ɗaukar shirye-shirye, an gina shi ne a hankali karkashin jagorancin ɗan fim kuma tsohon mai watsa shirye-shirye, Abdullaziz Dansmall.
Rahoton City People da aka wallafa ranar 5 ga Oktoba ya bayyana cewa, Film Village da aka tsara a Kano a shekarar 2016 ba gwamnatin tarayya ce ta samar da shi ba, wanda daga baya aka dakatar da shi. Wannan cibiyar kuwa wani aiki ne mai zaman kansa da Dansmall ya fara ginawa daga ribar da ya samu wajen shirya finafinai, musamman bayan aikin Gidan Haya.
A cewar rahoton, aikin ya kasance ana faɗaɗa shi ne a hankali, da nufin samar da wuri da zai rage wa masu shirya fina-finan Hausa wahalar neman gidaje, otal-otal, tituna da sauran wuraren da suke haya a duk lokacin da suke buƙatar ɗaukar wani fim.
Kano Film Village ta kuma samu ƙarin kulawa bayan wata tawagar Team Europe ta ziyarci wurin a watan Yunin 2026 yayin tattaunawa kan harkar ƙirƙire-ƙirƙire, samar da ayyukan yi da bunƙasa fasahar matasa. Wannan ya ƙara sanya cibiyar cikin tattaunawar da ake yi kan makomar masana’antar finafinai a Kano.
Abin da ya fi ba wannan labari muhimmanci shi ne yadda aikin ya taso daga cikin masana’antar kanta. Maimakon jiran babban aikin da gwamnati ta sanar za ta yi shekaru goma da suka gabata.
