Shugaban ƙasa Bola Tinubu ya ce direbobin motocin Nijeriya yanzu za su iya siyan litar Man Fetur, wanda aka fi sani da fetur, a Naira 1,000 kowace lita.
Shugaban ya kuma bayyana cewa kwatankwacin litar man fetur, wato Standard Cubic Meter na Gas (CNG), za a iya samun sa a Naira 200.
Tinubu ya bayyana hakan ne yayin da ya gana da shugabannin kamfanin Nigerian Independent Petroleum Company (NIPCO), tare da darektan kamfanin, Mista Ramesh Kasangra, a fadar gwamnati dake Abuja a ranar Talata, bisa ga wata sanarwa da mai ba da shawara na musamman kan bayani da dabaru, Bayo Onanuga, ya fitar mai taken “Shugaba Tinubu ya gana da shugabannin NIPCO, yana yabawa da zuba jari a ɓangaren CNG.”
Ya ce, “Direbobin Najeriya za su iya siyan litar man fetur a kan Naira 1,000 ko kuma kwatankwacin man, gas, a Standard Cubic Meter a kan Naira 200. Mun kuma ƙaddamar da shirye-shiryen tallafa wa direbobin kasuwanci don su sauya daga amfani da man fetur zuwa gas kyauta.”
Sanarwar ta ƙara da cewa, “Shugaban ya yaba da gudunmawar da NIPCO ke bayarwa ga ƙoƙarin sauya tsarin makamashi na ƙasa, musamman goyon bayansu ga shirin shugaban ƙasa na CNG.
“Yayin tattaunawar, Shugaba Tinubu ya amince da rawar da NIPCO ke takawa wajen ƙarfafa amfani da CNG a matsayin wata hanya ta makamashi, yana mai cewa irin waɗannan zuba jarurruka suna da alaka da manufofin gwamnatinsa na tsaro kan makamashi da faɗaɗa tattalin arziki.
“Ya jaddada muhimmancin haɗin gwiwar gwamnati da masu zaman kansu wajen tura tsarin sauya makamashi zuwa mafita mai tsafta da araha ga ‘yan Najeriya.
Ì
“Shugaban ya jinjina wa ƙoƙarin da NIPCO ke yi wajen tallafawa da kuma inganta kamfen din ‘Switch to CNG,’ wanda ya taimaka wajen kara wayar da kan jama’a da kuma samar da kayan sauya man zuwa CNG kafin fara shirin na shugaban ƙasa na CNG.”
A watan Janairun 2024, NIPCO ta ce ta zuba jarin sama da Naira biliyan 100 wajen shimfida bututun don sauƙaƙa samun CNG daga manyan bututun da ke ratsa jihohin da take aiki, da kuma gina tashoshin CNG a fadin kasar.
