Daga MAHDI MUSA MUHAMAMD
Shugaban ƙasa, Bola Ahmed Tinubu, ya bai wa ’yan Nijeriya tabbacin cewa matsalolin wutar lantarki da ake fuskanta a kwanakin nan za su fara sauƙaƙa nan ba da jimawa ba, yana mai cewa gwamnatinsa na ɗaukar matakan da suka dace domin kawo gyara mai ɗorewa a fannin makamashi.
Shugaban ya bayyana hakan ne yayin babban taron jam’iyyar APC da aka gudanar a birnin Abuja, inda ya amsa koke-koken jama’a kan yawaitar katsewar wutar lantarki a sassan ƙasar.
A cewarsa, gwamnati na sane da irin wahalhalun da jama’a ke fuskanta, musamman sakamakon raguwar samar da wutar lantarki a baya-bayan nan, amma ya jaddada cewa ana kan hanyar magance matsalar.
“Na san da koke-koken da ake yi kan wutar lantarki. Ina tabbatar muku cewa muna aiki tuƙuru kan hakan, kuma nan gaba kaɗan za a fara ganin sauyi mai ma’ana,” inji shi.
Ya ƙara da cewa, gwamnati na shirin ƙara ƙarfin lantarki ta hanyar sabon tsari na kula da kadarorin wutar lantarki, inda za a samar da ƙarin megawatt 1,500 domin ƙarfafa tsarin rarraba wutar lantarki a ƙasar.
Shugaban ya bayyana cewa manufofin da gwamnatinsa ke aiwatarwa sun fara haifar da sakamako a zahiri, yana mai cewa ba wai kalamai kawai ake yi ba, illa ayyuka da ake iya gani da auna tasirinsu.
“Mun fara fita daga yanayin tsira kawai zuwa yanayin daidaito da ci gaba,” inji shi.
Tun bayan hawansa mulki a shekarar 2023, Shugaba Tinubu ya ƙaddamar da sauye-sauye da dama a fannin tattalin arziki, ciki har da daidaita farashin canjin kuɗi da kuma cire tallafin man fetur. Duk da cewa waɗannan matakai sun fuskanci suka daga ɓangaren adawa, gwamnatin na dagewa cewa su ne ginshiƙin farfaɗo da tattalin arzikin ƙasa.
Shugaban ya amince cewa hanya ba ta da sauƙi, amma ya tabbatar da cewa Nijeriya na kan turbar da ta dace, yana mai nuni da ƙaruwa a amincewar masu zuba jari da kuma dawowar ƙasar cikin sahun ƙasashen da ake amincewa da su a fannin kuɗi na duniya.
A ƙarshe, ya buƙaci ’yan Nijeriya su ƙara haƙuri da juriya, yana mai cewa gyare-gyaren da ake yi za su haifar da ci gaba mai ɗorewa a fannoni daban-daban, musamman a ɓangaren masana’antu da samar da ayyukan yi.
