Daga MAHDI MUSA MUHAMMAD
Majalisar Dattawa, a ranar Talata, ta amince da wani ƙudirin doka na haramta amfani da kuɗaɗen waje wajen hada-hadar kasuwanci a Nijeriya.
Dokar da aka gabatar, da nufin tabbatar da cewa ana gudanar da duk wasu mu’amalar kuɗaɗe da suka haɗa da albashi a cikin naira don neman kawar da ayyukan nuna wariya da kuma ƙarfafa kwarin gwiwa kan kuɗaɗen cikin gida.
Wannan ya haɗa da sanya wajabta fitar da kaya zuwa ƙasashen waje da za a biya a naira.
ƙudirin ya yi wa laƙabi da “ƙudirin Dokar Kuɗi Na Babban Bankin Nijeriya, 2007, Lamba 7, don Hana Amfani da Kuɗaɗen ƙasashen Waje wajen Mu’amalar gida”.
Sanata Ned Nwoko wanda shi ne shugaban kwamitin majalisar dattawa akan ramuwa da komawa gida ne ya ɗauki nauyinsa.
A cewar Sanata Nwoko, yawaitar amfani da kuɗaɗen ƙasashen waje a cikin tsarin hada-hadar kuɗi na Nijeriya na lalata darajar Naira, tare da ci gaba da fuskantar ƙalubalen tattalin arziki.
Ya bayyana yadda ake amfani da dala, Pound Sterling, da sauran kuɗaɗen ƙasashen waje wajen hada-hadar kasuwanci a cikin gida a matsayin wani abin tarihi na mulkin mallaka da ke ci gaba da kawo cikas ga ‘yancin cin gashin kan Nijeriya.
Ya ce ƙudirin dokar na neman “hana albashi da dala, hada-hadar kasuwanci, da biyan kuɗaɗen ƙasashen waje, tare da tabbatar da biyan duk ma’aikata, ciki har da ‘yan ƙasashen waje a naira.
Ya kuma ba da shawarar a sayar da ɗanyen mai da sauran kayayyakin da ake fitarwa zuwa ƙasashen waje kawai a Naira, wanda hakan zai sa masu saye na kasa da kasa su sayi kuɗin tare da fitar da buƙatarsa da kimarsa.
Ya ƙara da cewa, dokar za ta sanya Naira a matsayin babban kuɗin shiga ga dukkan harkokin hada-hadar kuɗi, ta yadda za ta ƙarfafa ƙarfinta a tattalin arzikin ƙasar.
