Shugaban Kwamitin bincike kan gobarar tankar mai da ta faru a Majia, Jihar Jigawa, DIG Hafizu Muhammad Inuwa (mai ritaya), ya miƙa rahoton bincikensu ga Gwamna Umar Namadi. Gobarar, wadda ta faru a ranar 14 ga Oktoba, 2024, ta yi sanadin mutuwar mutum 209 tare da jikkata wasu da dama.
Kwamitin, wanda ya ƙunshi jami’an gwamnati, wakilan tsaro, ƙungiyoyin farar hula da shugabannin al’umma, ya mayar da hankali kan gano dalilan afkuwar gobarar, kimanta asarar da aka yi da kuma bayar da shawarwari don kaucewa irin wannan hatsari nan gaba. Shugaban kwamitin ya bayyana cewa sun tattauna da mahukunta, sun ziyarci asibitoci kuma sun gana da al’ummomin da abin ya shafa.
A cewar rahoton, dalilan da suka haddasa gobarar sun haɗa da lalacewar katangar tashar mota, ramukan hanya a kusa da wurin, tuƙi da daddare da kuma gudun wuce kima. Rahoton ya kuma bayyana cewa gobarar ta tashi ne sakamakon gogayya tsakanin kwantena na ƙarfe da ƙasa yayin da mutane ke ƙoƙarin kwasar man da ya zube. Baya ga asarar rayuka, an tabbatar da lalacewar kadarori na miliyoyin naira, inda iyalai 167 suka shiga cikin wannan mummunan hali.
Da yake mayar da martani, Gwamna Namadi ya yaba wa kwamitin bisa gaggawar kawo rahoton bincikensu, kuma ya tabbatar musu cewa gwamnati za ta duba rahoton don ɗaukar matakan gaggawa. Ya kuma gode wa mambobin kwamitin bisa jajircewarsu wajen gudanar da wannan bincike mai muhimmanci.
Gwamnatin jihar da al’ummar Majia na sa ran ganin aiwatar da shawarwarin kwamitin don inganta matakan tsaro da kuma hana afkuwar irin wannan bala’i a nan gaba. Wannan rahoto ya ƙara jaddada muhimmancin ɗaukar matakai cikin hanzari don kare rayuka da dukiyoyin jama’a.
