Daga AISHA ASAS
Najeriya ta shiga cikin jimami bayan rasuwar fitaccen jarumin barkwanci na TikTok, Sanku, wanda ya gamu da ajalinsa a wani hatsarin mota a kan hanyar Oyo–Ogbomoso kusa da Ibadan, a ranar 1 ga Satumba, 2025. Wannan hatsarin ya ɗauki rayuwar jarumin yana a shekarun ƙurciyarsa.
Sanku ya tara sama da mabiya miliyan 1.9 a TikTok, inda ya shahara da nishaɗantar da matasa ta hanyar barkwanci mai taɓa zuciya. Rashinsa ya bar giɓi a dandalin nishaɗi na Najeriya, inda aka cika shafukan sada zumunta da hotunansa da saƙonnin ta’aziyya daga abokan sana’a da masoya.
Hakazalika fitattun ’yan wasan Nollywood da masu shirya fina-finai sun nuna jimaminsu. Wani abokin sana’arsa ya ce: “Sanku ya kasance mutum mai sauƙin kai da baiwa ta musamman. Rashinsa babbar asara ce ga Najeriya da duniya baki ɗaya.” Masana sun yi kira da gwamnati ta ƙara sa ido a kan hanyoyin mota domin rage yawan asarar rayuka.
