Daga SANI AHMAD GIWA a Abuja
Sabon Shugaban Cocin Roman Katolika, Paparoma Leo na 14, ya gayyaci Shugaban ƙasar Nijeriya Bola Ahmed Tinubu a hukumance zuwa birnin Rome domin halartar bikin rantsar da shi a matsayin Bishop na Rome na 267.
Bayo Onanuga, mai ba shugaban ƙasa shawara kan harkokin yaɗa labarai da dabaru ya fitar a ranar Alhamis ne ya bayyana gayyatar.
A cewar sanarwar, Shugaba Tinubu zai bar Abuja ne a ranar Asabar mai zuwa domin halartar wani gagarumin taro a dandalin St. Peter’s da ke birnin Vatican, inda za a naɗa Paparoma Leo na 14 a hukumance a ranar Lahadi 18 ga watan Mayu.
A cikin wata wasiƙa da ya aike ta hannun Cardinal Pietro Parolin, Paparoma ya jaddada muhimmancin halartar Tinubu a wannan mawuyacin lokaci a harkokin duniya da na majami’u.
“Babban al’ummarku ta fi soyuwa a gare ni yayin da na yi aiki a Majalisar ɗinkin Duniya a Legas a cikin 1980s,” Paparoma Leo ya rubuta, yana tuna lokacinsa a Nijeriya.
Waɗanda suka haɗa da shugaban ƙasar a wannan tafiya akwai manyan mambobin ɗarikar Katolika na Nijeriya, ciki har da ƙaramin ministan harkokin waje, Ambasada Bianca Odumegwu-Ojukwu; Archbishop Lucius Ugorji na Owerri, Shugaban Majalisar Bishop ɗin Katolika na Nijeriya; Archbishop Ignatius Kaigama na Abuja; Archbishop Alfred Martins na Legas; da Bishop Matthew Hassan Kukah na Diocese na Sokoto.
An zaɓi Paparoma Leo na 14, wanda tsohon Cardinal Robert Francis Prevost ne kwanaki 27 bayan mutuwar Fafaroma Francis a ranar 21 ga Afrilu. Zaben da ya yi da Kwalejin Cardinal ya zama sabon babi na shugabancin Cocin Katolika.
Ana sa ran Shugaba Tinubu zai koma Abuja ranar Talata 20 ga watan Mayu.
