Daga MAHDI MUSA MUHAMMAD
Hukumar Shirya Jarrabawar Shiga Jami’a (JAMB) ta fara sake duba tsarin jarrabawar gama-gari na shekarar 2025 da ta gabata sakamakon ƙorafe-ƙorafe da ɗalibai suka yi a faɗin ƙasar nan.
Hukumar jarrabawar ta JAMB, wacce ta fitar da sakamakon jarrabawar UTME ta 2025 a ranar Juma’ar da ta gabata, ta amince da karɓar ƙorafin da ba a saba gani ba game samun ƙarancin maki a jarrabawar.
A wata sanarwa da ta fitar a ranar Litinin da ta gabata, Hukumar JAMB ta ce ta na hanzarta bin diddigin matsalolinnda aka samu a jarrabawar.
Hakan ya ƙunshi matakai uku masu muhimmanci: rajista, jarrabawa, da sakin sakamako.
Hakan ya biyo bayan rahotannin rashin samun isasshen maki a cikin UTME da aka kammala kwanan nan.
Ga yadda ɗalibai za su kai ƙorafi a hukumance game da sakamakonsu:
1. A ziyarci shafin taimako na JAMB a https://www.jamb.gov.ng/support.
2. A danna “Create Support Ticket.”
3. Za a sa ka bayyana ko kai ɗalibin da ya rubuta JAMB ne ko kuma za ka kai ƙorafin ne a madadin wani.
4. Za ka cika fam ɗin sannan ka aika. A tabbatar an yi amfani da ingantaccen adireshin imel kuma a lura da lambar ID ɗin.
5. JAMB za ta sanar da kai ta hanyar imel da zarar ƙorafinka ya samu zuwa wurin ta.
6. Don bin diddigin martani, ziyarci https://support.jamb.gov.ng/candidate-support/my-tickets.ɗalibai ba sa buƙatar ziyartar Hedikwatar Hukumar ko ofisoshin jiha don gabatar da ƙorafi. Yakamata a shigar da duk ƙorafe-ƙorafe akan https://www.jamb.gov.ng/support.
