Daga AISHA ASAS
A duniyar adabi, akwai lokacin da aikin marubuci ya bar hannunsa ya shiga hannun alkalai. Daga nan, ba yawan kalmomin da ya rubuta ne kawai ake dubawa ba, ana duba yadda ya gina tunani, yadda ya ba da labari da kuma irin muryar da aikinsa ya kawo.
A wannan makon, marubutan Afirka sun shiga irin wannan mataki bayan African Writers Awards ta fitar da jerin sunayen waɗanda suka rage a gasar shekarar 2026 ranar Litinin, 5 ga Oktoba.
Jerin ya ƙunshi ayyuka daga fannoni daban-daban da suka haɗa da waƙa, prose, gajerun labarai da adabin yara, tare da marubuta da matasan masu rubutu daga ƙasashe daban-daban na Afirka.
Najeriya na cikin ƙasashen da suka samu wakilai a jerin. A African Teen Writers Awards na waƙa, misali, Ibifuro Wariboko da Tobi Brian suna cikin waɗanda aka zaɓa daga Najeriya, yayin da sauran rukunin gasar su ma suka ƙunshi wasu ‘yan Najeriya.
Jerin ya kuma ƙunshi marubuta daga Kenya da Zimbabwe, da sauran ƙasashen Afirka, abin da ya sa gasar ta zama wani wuri da muryoyi daban-daban na nahiyar ke haɗuwa.
A cewar masu shirya gasar, yawan nau’o’in rubuce-rubucen da aka gabatar da kuma ingancin ayyukan ya sa aikin alkalanci ya kasance cike da taka-tsantsan da kulawa sosai kafin a kai ga wannan jerin.
Waɗanda suka rage za su jira mataki na gaba na gasar, yayin da ake shirin gudanar da taron African Writers Conference a Kampala, Uganda, inda za a kammala wannan tafiya da sanar da waɗanda suka yi nasara.
Ga marubuci, shiga irin wannan jerin ba yana nufin kyautar ta zama tasa ba. Yana nufin an karanta aikinsa, an kwatanta shi da sauran ayyuka, sannan aka ga ya cancanci ci gaba da tafiya.
Kuma a duniyar da ake rubuta labarai da waƙoƙi marasa adadi, samun muryarka cikin waɗanda aka ce a tsaya a saurare su, ba ƙaramin ci gaba ba ne ga wanda ya samu kansa a ciki.
