Ɗan wasan Super Eagles ya dambace da Finidi akan rububin rigar Pepe bayan wasansu da Portugal

Daga MAHDI M. MUHAMMAD

An kwashi ’yan kallo a tsakanin ɗan wasan Super Eagles, Moses Simon, da fitaccen mataimakin kocin Nijeriya, Finidi George bayan Nijeriya ta sha kashi da ci 4-0 a hannun Portugal a wasan sada zumunci na ƙasa da ƙasa a daren Alhamis, 17 ga watan Nuwamba, 2022.

Yayin da ’yan Najeriya ke ta takaicin rashin nasara a wasanni na sada zumunta a jere, mataimakin koci Finidi George da ɗan wasan gaba, Moses Simon sun aikata abin da ya ba kowa mamaki.

A matsayin al’ada bayan wasan, ‘yan wasa suna musayar riguna, abin da Moses da ɗan wasan bayan Portugal, Pepe ke ƙoƙarin yi kenan lokacin da aka ga George na neman ya ƙwatar wa kansu rigar.

Koda yake ba za a ji su ba, George bai ji daɗi ba cewa Moses ya doke wajen karɓar rigar. ‘Yan wasan, duk da haka, sun gama yin musaya da rigarsu suka tafi.